Shillong, Jymmang 25: Ka Kynhun Myntri jong ka Sorkar Jylla hynne ka sngi balang kala mynjur ïa ka jingpynkylla thymmai ïa ki kyndon jong ka Meghalaya Secretariat Services Rules, 1992.
U Myntri Rangbah ka Jylla Conrad K Sangma ula ong ba da kane ka jingpynkylla, ki bor thungkam ha ka kyrdan Under Secretary, Deputy Secretary bad Joint Secretary kan dei ka Chief Secretary naba kim dei satia ka senior post.
U Conrad u pyntip ba mynshuwa ïa kine ki kam la thung da u Lat ka Jylla.
U Myntri Rangbah ula pyntip ruh ba ka Kynhun Myntri kala mynjur ban pynkylla thymmai ïa ki kyndon jong ka Meghalaya Agriculture, Engineering, Medical Rules kaba thmu ban nang pynbun ïa ka jingkyntiew kyrdan hala ki jong ki Tnad treikam na ka 25% sha ka 30%.
Haba pyntip ba baroh ki Tnad Sorkar ki pyntreikam ïa ka 30% ka jingkyntiew kyrdan, u Conrad ula ong “Ha ka jaka ban shu thungkam ha ki jaka ba lait, mynta yn shu pyndap noh da ka jingkyntiew kyrdan”.
Ha kajuh ka por, ka Sorkar Jylla kala rai ruh ban pyntreikam ïa ka Revised All India Council of Technical Education scale ïa palat 32 ngut ki Nonghikai jong ka Shillong Polytechnic bad kiwei hadien ka jingpynkynriah kam ïa ki sha ka Directorate of Higher & Technical Education.
