Mawkyrwat, Jylliew 25: Ka South West Khasi Hills District Athletics Association (SWKHDAA) da ka jingkmen bad sngewsarong mynta ka sngi ka 25 tarik u Jylliew, 2024 ka la pynlong ïa ka program pynkup burom ïa ki nongïalehkai kiba ka poi sha ka thong jong ka jingjop lyngba ka jingwanrah jong ki da ka takma ksiar.
Kiba la shah pynkup burom ki long i kong Kmoiñ Wahlang kaba la ju long ka longkmie ba la kham rangbah kaba ju leit mihkhmat ha kiba bun ki jait jingïamareh, u bah Tlanding Wahlang, u la jop ha ka Lonawala Ulta ha Pune, u bah Swonding Mawlong u jop ha ka 25k ha Kolkata, ka Marqueenless Ramsiej – ka la jop ha ka Meghalaya Game 2024 ha Tura, ka Bandasharai Marweiñ – ka jop ha ka kyrdan ba ar ha ka North East Game 2024 ha Nagaland, ka Ibansara Wartde – ka jop ha ka Inter District School 2024, bad ka Lyntijingkyrmen Kharjahrin – ka jop ha ka Meghalaya Game 2024 bad ha ka State Level Inter-School.
U bah D. Synkon, District Sports Officer, South West Khasi Hills District kum u kongsan haba kren ha ka jingïalang u la pynpaw ka jingsngewkmen ban don ha kum kane ka program kaba long shibynta ban ai mynsiem lem ïa ki nongïalehkai kiba dei ha ka bynta jong ka jingmareh thoh la ka long ha ki jingmareh ba jan ne wat ba jngai ruh ne ki long distance. Namarkata, kane ka jingwanrah jingjop jong ki ka long ka burom ïa ki nyngkong, ïa ka distrik, ka jylla bad ka ri India baroh kawei.lei
Halor ka jingshah jied jong ka kong Kmoiñ Wahlang ban leit ïashimbynta ha ka 13th Pan Pacific Masters Games 2024 ka ban sa long ka Gold Coast, Queensland, Australia ha ki tarik naduh 1 – 10 tarik u bnai ‘Naiwieng, 2024, u bah Damang Syngkon u la ong ba un sa thaw ki lad ki lynti ban noh jingïarap. Shuh shuh u pynkynmaw ba shwa kata kum ka ophis hi ka la dep ban ai jingïarap ïa ka Kmoiñ Wahlang ha shwa ba kan leit sha ka 75+ Age Category ha Hyderabad namar ha kane kin sa jied ban leit sha kiwei de ki jaka.
Kumta da ka jingjop jong ka kong Kmoiñ Wahlang ha ka jingiakhun ha Hyderabad kaba dei jong kiba la palat 75 snem mynta ka la hap ban pynkhreh pat ban leit sha ka 13th Pan Pacific Masters Games 2024 bad da kane ka long ka burom ïa ka. Namarkata, u la ai mynsiem ïa ka kong Kmoiñ ba ka dei ban long kaba la khreh ban leit sha kawei pat ka ri khnang ba kan lah wanrah ïa u soh jong ka jingjop.
Kiba la don lang ha kane ka sngi ki long u bah Ehbok Syiem, PTI jong ka Office jong u DSO, u Myntri Shnong Sakwang, u bah S. Kharjahrin, u bah B. Lyngkhoi, President ka South West Khasi Hills District Athletics Association (SWKHDAA), u bah S.E. Wanniang, Secretary ka South West Khasi Hills District Athletics Association lem bad kiwei de.
