Shillong, Jylliew 24 : Ka Khasi Students Union (KSU) ka la dawa ban pynlong da ka jingtohkit kaba bniah halor ka jingkynnoh shoh briew ne thombor ki Border Security Force (BSF) pyrshah ïa ka ïing ka sem ha Kuliang kaba don ha khappud ka ri kaba ha East Jaiñtia Hills District ha ka 19 tarik mynta u bnai.
Ha ka jingujor ba la aiti ha u Deputy Commissioner, ka KSU ka la ong, “Kane ka shithi kaba la aiti kadei ka jingujor bad ka jingkyrpad ban pynlong ka jingtohkit kaba bniah halor ka jingkynnoh ba ktah kti, ba shoh briew ba la kynnoh ba dei ki shipai BSF. Ngi kyntu ïa ki bor pynïaid distrik ban pynshitom kham kloi ban pynthikna ïa ka hok bad ba kum kine ki kam riewkhlaw kim dei shuh ban jia.”
Ka KSU ka la dawa ruh ba ïa kiba donkti dei ban wanrah sha ka aiñ bad dei ban ai ka jingïada bad ka jingkyrshan ïa katei ka longïing kaba mad ïa kane ka jingshah thombor.
Ka jingujor ka ong ba ha ka 19 tarik mynta u bnai, ki riew shimmet ba la kam ba ki dei ki BSF ki la rung da ka bor hapoh ka ïing jong u Bah Shanroi Lyngdoh Lyngkhoi da kaba pynpra ïa ka jingkhang ïing khlem kano kano ka jingpyntip lypa ne ka jingpynithuh ïalade.
“Hangta hi ki la thombor ïa katei ka longïing, kaba la pynmynsaw ruh ïa u Bah Lyngkhoi, uba la kdiah ka syiengkrung, bad mynsaw ha ka met bad ka jingshah jrong kti ka khun. U Bah Lyngkhoi, wat hapdeng ka jingthmu ban ïada ïalade, ki la shah thombor beit ha kaba u Bah Lyngkhoi u la mynsaw jur bad kdiah ka shyiengkrung. Shuh shuh pat ha ka por kumba 12:30 mynstep ha ka 20 tarik mynta u bnai 2024, kitei ki shipai ki la wan khambun ngut kumba 15 ngut, ki la pynjur ïa kane ka jingleit thombor ïa u Bah Lyngkhoi bad ka ïing ka sem jong u,” ka la ong.
Ka la ong ba kane ka dak jingleh da ki riew shimet kiba dei kiba bat aiñ kum ki BSF ka long kaei kaei ka bym lah pdiang bad ka donkam ka jingtuklar kaba kyrkieh, ong ka KSU.
