Ban ryntih ka rukom ai syrnod ST, da ka aiñ ba long salonsar yn thaw ka Sorkar Jylla

Shillong, Jylliew 19 : Khnang ba ka jingai ïa ka syrnot Schedule Tribe kumjuh ïa ka Clan Certificate sha ki nongshong shnong ka jylla kan long kaba ryntih, ka sorkar jylla ha ka sngi Balang ka la shim ïa ka rai ban thaw noh da ka aiñ kaba long salonsar khnang ba ka jingpyntreikam kan long ryntih lang ha baroh ki lai tylli ki district council jong ka jylla.
Ïa kane ka rai la shim ha ka jingïalang ba la lum da u Symbud Myntri Rangbah ka jylla Bah Prestone Tynsong ïa ka tnad District Council Affairs bad kumjuh ruh ïa ka tnad Social Welfare hapoh ka jingïalam jong u Myntri ka tnad, Bah Paul Lyngdoh nalor ki nongmihkhmat na ki district council ka jylla.
Na ka liang u Bah Paul Lyngdoh haba kren sha ki lad pathai khubor u la ïathuh ba katkum ka Office Memorandum (MO) kaba ïadei bad ka jingai syrnod ST ba la pynmih da ka tnat Social Welfare ka Sorkar Jylla kadei thik tang halor ka aiñ ba pynmih ka KHAD Lineage Act 1997. Kumta u ong ba dei halor katei ka nongrim ba ki sngew donkam ban pynïar ïa ka jingpyntreikam ïa ka sha u pud u sam jong ka JHADC bad GHADC.
Shuh shuh u ong ba ka jingïalang ka la shim ruh ïa ka rai ban bthah ïa ka Jaiñtia Hills Autonomous District Council (JHADC) bad ka Garo Hills Autonomous District Council (GHADC) ban phah ïa ki jingai jingmut haba ïadei bad ki jingdonkam naka bynta ban wanrah da kawei ka aiñ ban ai syrnod Schedule Tribe (ST) bad Clan certificate ha ka jylla.
U Bah Paul u la ong ruh ba kumba long mynta ka GHADC bad ka JHADC kim pat don satia la ki jong ki aiñ, hynrei na ka liang ka GHADC ka dang thaw ïa ka Bill katba ka JHADC kam pat sdang satia.
“Namar kane ka kam ka don jingïadei bad ka ïoh kam ïoh jam, ban pynithuh mano ba dei ki riewlum bad ter ter, kumta ka long kaba donkam ban kynthup lang ïa baroh ki Scheduled Areas ka Jylla ban wanrah ïa ka jingai ST ba long kumjuh ïa baroh,” u la ong
U la ïathuh ruh ba ka sorkar jylla kan sa thaw da ka Committee kaba ma u kum u Myntri ka tnad Social Welfare un khlieh kum u Chairman. Ha kane ka committee yn kynthup lang ïa baroh lai tylli ki ADC, ha kaba ka tnad DCA bad ka Law Department kin khmih bad bishar bniah ïa ki jingai jingmut na baroh 3 tylli ki District Council.
La pyntip ruh ba kan don sa kawei pat ka jingïalang kaban bishar bniah ïa ki jingai jingmut na ka bynta ban pyntyllun ïa ka kam ban wanrah da ka rukom treikam kaba long salonsar haba ïadei bad ka jingai syrnot ST bad clan certificate ha baroh kawei ka jylla.