Shillong, Jymmang 24: U Dr. Mukul Sangma, Myntri Rangbah barim ka jylla, u la ong ba dei ban kem ïa ki Pulit Assam kiba la thombor ïa ki paidbah jong ka Malangkona, West Khasi Hills District hynnin ka sngi.
U la dawa ruh ba ka sorkar Meghalaya bad Assam kidei ban ïakynduh mardor ban ïakren ïa kane ka jingjia.
Haba pynrem jur ïa ka jingjia hynnin ka sngi ha katei ka Shnong khappud ka Meghalaya bad Assam, kaba mynta ka la hap noh sha Assam hadien ka jingïapynbeit pud hapdeng kine ki artylli jylla, u Dr. Sangma, u la ong ba ki don ki aiñ jong ka sorkar pdeng kiba la mynjur da ka Parliament, kiba pynshitom ïa kino kino ki bor kiba ktah kti ne kiba thombor ïa ki jaidbynriew riewlum bad kiwei de ki ritpaid. “Ka Malangkona kadei ka Shnong kaba shong da ki riewlum. Kumta ki Pulit Assam kidei ban shah kem”, u la ong, da kaba bynrap ba ki don ruh ki kyndon kiba kdew ba haba kem ym lah ruh ban bah jamin.
Shuh shuh u Nongalam ka Liang Pyrshah, u la ong ba nalor ki aiñ ba ïada ïa ki riewlum ki don ruh ki aiñ kiba ada ïa k kynthei ki khynnah, namarba ka jingjia ha Malangkona kumba lah ban ïohi na ki Video ka don ka jingthombor ne jingkreb jot wat ïa ki kynthei.
U la ong ba kadei kadei ka buit jong ka Assam ban pyntieng pynsmiej ïa ki paidbah na Meghalaya ki bym treh ban leit ïasoh bad ka Assam. “Kadei kamram jong baroh artylli ki jylla ban peit ïa ka shongsuk shongsaiñ jong ki paidbah khappud, ïa kaba la mynjur ruh naduh ka snem 2010-2011”, u la ong.
