New Delhi, Jylliew 17: U Rahul Gandhi, nongïalam ka Seng Congress, un iehnoh noh ne pyllait noh ïa ka Wayanad Constituency bad na kane ka Constituency kaba don ha Jylla Kerela yn ïakhun noh ka para jong u, ka Priyanka Gandhi.
Lah ban kdew hangne ba u Rahul, ha kane ka ilekshon MP ba la dep, u la jop na Wayanad bad na Raebareli Constituency bad jop baroh artylli.
Katkum ki kyndon treikam jong ka riti synshar ha ri India, uno uno u nongmihkhmat uba jop ilekshon na ki artylli ki Constituency u hap ban pynbna ban iehnoh noh ïa kawei hapoh 14 sngi.
Ïa kane ka rai jong u Rahul la pynbna da u President ka Seng Congress u Mallik Arjunkharge mynta ka sngi hadien ka jingïalang jong ki heh jong ka Seng Congress.
Kane ka rai ban pynïakhun ïa ka Priyanka kan long ka sien ba nyngkong eh ba ka khun jong u Rajiv Gandhi bad ka ksiew jong ka Indira Gandhi ba kan mih ban ïakhun ia ka elekshon.
Hynrei baroh shi katta ka Priyanka ka shu leit ban kanbas na ka Seng bad khamtam eh ha ki Constituency ba ïakhun u Rahul bad ka Sonia Gandhi.
U Rahul u la ïakhun ïa ka ilekshon MP mynta ka snem na Raebareli hadien ba ka kmie jong u ka Sonia Gandhi ka la rai ban nym ïakhun shuh ïa kane ka ilekshon ba la dep.
