Shillong, Lber 23 : Ki pulit ka jylla ha ka sngi Saitjain kila pynmih ïa ka jingbthah ha kaba ki la kyntu ïa kiba shah dawa pisa ha ki kynhun kieng atiar kiba la shah kheiñ be-aiñ kata ka HNLC bad GNLA ba kim dei satia da lei lei ruh ban siew pisa sha kitei ki kynhun.Namar lada jia ba lap ïa kino kino kiba siew ruh kin ngat ha ki kyndon ain UAPA.
U Director General of Police (DGP) Dr LR Bishnoi ha ka kyrwoh khubor ula ong, ba ki pulit ki la ïoh ïa ki jingtip ba bun ngut ki briew ki la ïoh pdiang ïa ki shithi dawa pisa na ka Hynniewtrep National Liberation Council (HNLC), Garo National Liberation Army (GNLA) bad kiwei kiwei lyngba ka social media sites/apps (Whatsapp, Telegram/SMS).
Ula ong, ka long kaba donkam ïa ki nongshong shnong ban sngewthuh ba ka jingai ïa ka pisa ban kyrshan ïa ki kynhun kiba la shah ñiew be-aiñ ka dei kaba sniew bad ka jingpynkheiñ ïa ki kyndon aiñ.
“Ka jingai jingkyrshan ym tang ba ka nang ai ding ïa ki kam be-aiñ bad kiba pyrshah ïa ka ri, hynrei ka buh ruh ha ka jingma ïa ka jingim jong ki briew kiba lui lui bad ka ktah ruh ïa ka jinglong jingman ha ka imlang sahlang. Ka jingdon bynta ha ka ban ïarap ai pisa ïa ki kynhun be-aiñ, kam dei tang ka jingpynkheiñ ïa ka aiñ hynrei ka ïuhroit ruh ïa ka jingpyrshang da baroh ban ïada ïa ka Ri na ki kam pyntriem ki lehnoh bad ki kam be-aiñ ki jongki” la ong u Bishnoi.
U DGP ula maham ïa ki paidbah ba ki dei ban kiar ban ai kano kano ka jingsiew sha kino kino ki briew ne kynhun bad ula ong ka jingsiew pisa sha ki kynhun be-aiñ kan khring ïa ki kyndon jong ka Section 11, 13 & 17 jongka Unlawful Activities (Prevention) Act, 1967 bad kumjuh ïa ka Section 4 jongka Prevention of Money Laundering Act bad ka Section 109 IPC.
Ula ong, kiba shah dawa pisa ki dei ban pyntip sha ki pulit khnang ba kin ïoh leh ïa kaba donkam bad yn buhrieh ïa ka kyrteng bad ïa kino kino ki jingtip shaphang jongki.
