Shillong, Lber 18: Kumba lai tylli ki Sengbhalang ha ka sngi Nyngkong ha ka jingïalang kiba ki la pynlong kila dawa ïa ka Sorkar Meghalaya Democratic Alliance (MDA) kaba la ïalam da ka National Peoples’ Party (NPP), ba kan kren ïa ka Sorkar Pdeng ba kan pyllait noh pura ïa ka Meghalaya na ka jingtreikam ka Citizenship (Amendment) Act, 2019 bad ka Rules 2024 nalor ban mynjur noh ha ka ban pyntreikam ïa ka Inner Line Permit (ILP) ban tehlakam ïa ka jingwan rung kyrthep ki briew nabar ka Jylla sha kane ka jylla.
Kitei ki Sengbhalang ki kynthup ïa ka Hynñiewtrep Youth Council (HYC), ka Jaiñtia National Council (JNC) bad ka Confederation of Ri-Bhoi People (CoRP). Kitei ki seng kila aiti ruh ïa ka dorkhas sha u Myntri Rangbah (MR) ka Jylla Conrad K Sangma ba un shimkhia ïa kane ka kam kaba la donkam kyrkieh.
Ha kaba ïadei bad kane haba ïakren bad ki lad pathai khubor, u President ka HYC Roy Kupar Synrem ula ong ba ki lai tylli ki seng ki la dawa ïa u Myntri Rangbah ba un ïakren bad ka Sorkar Pdeng ba kan pyllait noh pura ïa ka Meghalaya na ka CAA 2019 bad ka Rules jong ka nalor ban pyntreikam ïa ka ILP kham kloi kat kaba lah na ka bynta ka jingbha jong ka jylla baroh kawei.
Katkum ka jingïathuh jong u la ong ba ka Ministry of Home Affairs ka Sorkar India ha ka 11 tarik Lber, 2024, ka la pynmih ïa ka jingpyntip paidbah ïa ka Citizenship (Amendment) Rules 2024 na ka bynta ban pyntreikam noh ïa ka Citizenship (Amendment) Act, 2019.
“Watla ka CAA, 2019 ka la pyllait noh ïa ka jingtreikam na ki jaka riewlum jong ka Jylla, ka jingshisha hi kan ïai neh ba ym baroh ki jaka ha Meghalaya ki hab hapoh ka Sixth Schedule jong ka Riti Synshar ka Ri. Ki dang don ki jaka kum ka sor Shillong, ka nongbah jong ka Jylla ha kaba ki kyndon jong ka Sixth Schedule kim treikam satia bad ruh ka jaka ba bun eh ki briew ba nabar jylla ki wan ban shong ban sah,” ong u Bah Roy Kupar Synrem.
“Ha kum kine kiei kiei, lada ki briew ba sah ha kine ki jaka bym treikam ka Act ki lah ban kynriah ïa ka jaka sah bad sa aplai ïa ka jinglong nongshong shnong ka India hapoh ka Act, 2019. Lada kane ka jia, kumno ka Jylla kan khanglad ïa ki ba kin ïoh long nong India hapoh kane ka Act?. Hato kadon kano kano ka lad ka lynti ban buddien ïa ka jingdon kine ki briew kiba sah ha kine ki jaka khnang ba yn lah ban bishar ïa ki hadien habud,” ula buh jingkylli u Bah Roy Kupar Synrem.
Shuh shuh, u Bah Roy Kupar ula ong, “Ngi don ruh ka jingsngewkhia ba lada bun ki jaka hapoh ka Jylla kila lait na ka CAA, 2019, ka Jylla kan sa shah ktah na ka jingwan rung pat na kiwei ki Jylla khamtam ka Jylla Assam. Namar ka jingbym don kano kano ka aiñ ka ban pyrkhing ïa ka jingrung jingmih ki briew hapoh ka Jylla, ngi sheptieng ba kane ka jingpyllait (sixth Schedule) kan ym don jingmut bad ngi lah ban mad ïa ka jingeh kaba khraw na ka jingwan rung ki bar jylla hapoh ka Jylla”.
“Namar kata, ka lad jingïada hi kaba ngi lah ban don ban ïada ïa kane ka jingwan rung kiba nabar Jylla ka dei ka jingpyntreikam ïa ka ILP bad ruh ban pyllait noh ïa ka jingtreikam ka CAA ha Jylla,” ong utei u nongïalam ka HYC.
