Syier kiba shong dukan ha Motphran ba jur palat ka ïadie bad ïadih drok pylleiñ pylleiñ

Shillong, Lber 17: Ka jingbun bad jingkynrei kiba die bad kiba dih drok hapoh ka jylla katba nangmih ki sngi ka la nang pynshong syier ïa kiba bun ki nongshong shnong khamtam eh ha kaba ïohi ba ha kine ki sngi ka jingïadie bad ïadih drok kaba la long pylleiñ pylleiñ khamtam ha nongbah Shillong ka la long shaba palat.
Kawei na ki jaka kaba la long pylleiñ pylleiñ bha kadei ka pdeng jong ka Motphran kaba ju ïadie jhur hapdeng surok bad ka jaka kaba la ju buh ïa ka jaka bret ñiut kaba ha Motphran hi.
Kane ka jingleh ïa katei ka kam la ïathuh ruh da kiba shong dukan hajan kane ka jaka kaba ki la ong ba ka jingïadie bad ïadih drok ha katei ka jaka manla ka sngi ka la long kaba ishyrkhei bha.
Ki la ïathuh ruh ba mynta kiba die bad kiba dih drok ki la khambun bha kidei ki khynnah samla kiba dang rit bad ki la iathuh ruh ba ki nongdie ki ju pyndonkam lang ruh da ki kynthei kiba dei ki samla lud ban pynngop ne pynbeij ia ki lanot kiba la ngat ha kane ka kam.
Kiba bun na kiba shong dukan ha katei ka jaka haba iakren bad u nongthoh khubor ki la pynpaw ruh ia ka jingtieng bad sngew syier namarba tang shu lah kem dum kane ka tamasa iadie bad iadih drok ka la long kaba ishyrkhei bha.
Ki la ong ruh ba nalor ka jingdon ki nongkloh pla kiba la bun bha hapoh katei ka jaka bad hapoh iewduh hynrei mynta la mih pat sa kine kiba die bad kiba dih drok khlem salia shuh wat ban iohi ki briew ruh.
Haba kylli ki la ong ba mynta ym tang hapoh iewduh hynrei wat hapdeng jong ka Motphran kam long shuh kaba shngain kumta ki la pynpaw ia ka jingtieng namarba ki la iohi ba kane ka kam mynta ka la nangjur katba dang mih ki sngi, kumta ki la kyrpad ia ki bor jong ka ain ban ai ka jingpahara kaba biang bha ha kane ka jaka, khamtam eh ha ka por mynmied kaba dei ka por kaba thnem bha kane ka jingiakhaii bad dih drok kaba long pyllein pyllein.
“Mynta naduh ki nongtuh nongkloh pla ruh ki la don bynta lang ha ka kam iadie bad ia khaii ia une u jingdih ba pynbuaid uba la kynrei bha ha Shillong bad kumjuh ruh ha baroh kawei ka jylla,” ong ki katto katne kiba shong dukan ha u nongthoh khubor ki bym kwah ban iathuh kyrteng.