Haba ïaid kylleng kane ka ri Khasi-Jaintia jong ngi la shem ba ka jingduk ka la nang kiew bad kata ka jingduk ka pynlong ïa ngi ba ngin sngew rangli, sngew dukha mynsiem. Ngi sngew ba ka sur jingud jong ngi kam poi sha ki tyndong shkor jong ka sorkar. Katba nang ïaid ki sngi katta ngi nang ïohi ïa ki samla rit kiba la pep skul noh shipor. Ka jingduna ki skul heh kiba ai jinghikai haduh ka klas kaba shiphew bad haduh ka klas kaba khat-ar ka pynlong ïa kiba bun ki kmie ki kpa ba kin phah ïa ki khun jong ki sha ki skul ha Shillong. Kane ka mut ba ki khynnah skul ki hap ban shong iing wai, ban shet ban tiew bad ban pule kot ruh. Kito kiba na ki iing ki sem kiba ïoh ba kot te ka biang hi ban phah pule sha Shillong. Hynrei bun ki bym kot bor ban leh kumta. Te ym banse ban pynpep skul noh ïa ki khun kiba dang samla rit bad kiba dang shong ïa ka klas kaba hynriew ne hynniew.
Nga ïashem bad kawei ka khynnah samla kaba shong klas kaba khyndai. Mynta ka lah kiew sha ka klas kaba shiphew. Kane ka khynnah ka leit skul ha kawei ka skul ha Ri Bhoi. Lada phah pule ïa ki kot phareng tang kawei ka kyntien ruh kam nang. Sa hadien shisnem kane ka samla ka la dei ban ïaleh ïa ka eksamin matrik bad ki subjek baroh dei ban jubab da ka ktien phareng lait noh ka sobjek Khasi. Kane ka khynnah kam kot tang bad kiba shong ïa ka klas kaba nyngkong (Class-1) ban sngewthuh ïa ka ktien phareng. Ka jingkylli ka long kumno kane ka khynnah ka kiew klas manla u snem haduh ban da poi ka klas kaba khyndai, khlem da sngewthuh ïa kaei kaba ki nonghikai ki hikai? Haba nga kylli ïa ka shaphang kane, ka samla ka ong ba ki hikai beit da ka ktien Khasi wat ïa ka sobjek English ruh. Lada kum kine ki skul ki pynmih kum ïa kine ki khynnah pule hato ka sorkar kam la dei ban shim khia ïa kum kine ki jingjia?
Ha ki por kiba kham mynshuwa ka Sorkar ka ju thung ïa u/ka inspektor ban leit peit ïa ki skul baroh bad ban peit la ki nonghikai ki tbit ne em ban hikai bad lada ki khynnah ki sngewthuh ne em ïa ka jinghikai. Hynrei sngewsih ba mynta lah bun snem ym ju don shuh kita ki Inspektor leit jngoh skul bad dei na kane ka daw ba ka jinghikai ha kiba bun ki skul ka tlot bha. Ym dei ban kynnoh ïa ki khynnah skul haba ki pep skul noh tang shipor. Ki khynnah kim sngew myntoi shuh ban leit skul haba ki nonghikai kim i don ïa ka jingkitkhlieh bad ka jingnang ban batai ïa ki lynnong ha ka rukom kaba ki khynnah kin sngewthuh.
Kawei ka dawbah kaba pynlong ïa ki kmie ki kpa ban pynpep skul noh ïa ki khun tang shiteng por ka dei bunsien namar kim lah shuh ban siew bai skul bad thied uniform bad ban thied ïa ki kot ruh. Toi, lah dei ban don ka skim sorkar ban ïarap ïa kum kine ki longiing kiba duh tasam khnang ba lada ki khynnah ki pas ïa ka skul ki lah ban leit kolej bad kumta ter ter bad ki lah ruh ban ïoh ïa ki jinghikai ïa ki kam trei da ka kti (skill training) ban pynmih ïa ki tiar bapher bapher lane ban nang rah ïa ka dor jong ki soh ki pai da kaba pynkylla um soh lane kiwei pat ki jait jingbam. Kane ka ri ka long kaba seisoh bha. Ha ka por tlang ki mih ki soh ki pai kiba bun bad khamtam eh u sohniamtra. Hynrei duna eh kiba nang ban pynkylla um soh lane pynkylla jam ïa kita ki soh. Ïa kane la khot ka Food Processing lane ka jingpynkylla ïa ki soh sha kiwei pat ki kynja jingbam kiba kham neh. Mynta haba kheit ïa u sohniamtra lada ym lah die noh kloi kloi u lah sah ei bad lip dur noh ban ym lah dor shuh. Hynrei lada lah don kita ki Processing Unit ïa u soh lah ban pynkylla ha ki bun ki rukom bam bad kiba kham lehr uh ka dor. Kata kein ki khot ka “value addition” lane ka jingrah dor ïa ki soh ki pai bad ki jhur ruh kumba leh ïa u shynrai.
Ki don bun ki jingduna ha ki nongkyndong jong ngi. Nyngkong eh ki surok ki dei kiba la jot la pra. Ban pynkit ïa ki mar rep ruh ka long kaba shitom palat. Bad wat lada shna surok ruh tang shipor ka lah rong noh ka um slap. Ïa kane ka jingshna torti ïa ki surok ha ka jingshisha ki dei ki nongpynïaid shnong kiba dei ban ujor bad wanrah hakhmat ka sorkar. Ki dei ban kylli kumno u Engineer uba dei peit ïa ka jingshna jong ka surok u ai ïa ka Certificate ba lah pyndep ïa ka jingshna surok katkum ba la buh da ki kyndon PWD bad ha kano ka rukom u kontrak u ïoh jingsiew na ka bynta ki kam torti. Kum ban shu ai nuksa ka surok naduh Dienglieng shaduh Nongjrong kaba dang shna dang shisnem mynshuwa mynta pat ka la paw lut da ki mawria. Nangta ka surok na Shella sha Sohra shuwa ban poi Nongsawlia ka la khoh lut ha kiba bun ki bynta wat lada kato ka surok ka dei kaba dang shu lah maramot.
Mynta la sdang beh la lyer elekshon MP bad ki seng saiñ pyrthei baroh kin sa wan pah wan khroh ïa ki paidbah ban jied ïa u Candidate jong ki. Ha kum kine ki rynsan elekshon ki paidbah ki dei ban kdew ïa ki jingdkoh trei kam ka sorkar. Wat ïa die tad ïalade na ka bynta ki katto katne hajar bad jied ïa ki pnah thylliej kiba la pynbiej ïa ngi ki nongjied na ka por sha ka por. Lada ma ngi ki nongjied ngim kyndit bynriew ka jingduk kan nang ban ïa ngi katba kiba riewspah pat ki la nang kiew ka spah katba kiba duk pat ki la nang kylla rangli shuh shuh. Ki khynnah jong ngi ki dei ban ïoh ïa ka jingnang jingstad kaba biang ha ki skul kiba la pynïaid bha, ym kiba la shu thung ïa ki nonghikai kiba la thung namar ba ki “recommend” ki politishan. Ki nongshnong shnong ki hap ban long trai halor kine ki skul bad ki donhok ban buh jingkylli haba ki khun jong ki kim nang eiei ruh wat haba la poi haduh ka klas kaba khyndai bad shiphew.
Ngi dei ban kyndit bynriew noh mynta hynrei kane ka jylla kan sa sakma.
