Shillong, Lber, 16: Tang hapoh khyndiat kynta ba ka Election Commisssion of India (ECI) ka la pynbna ïa ka tarik ba pynlong ïa ka elekshon Lok Sabha, u District Election Officer jong ka East Khasi Hills District u la pynjari da ka Section 144 CrPC ban mana ïa kino kino ki briew ne ki kynhun ban rah pisa palat 50 hajar tyngka shaneng hapoh u pud u sam jong ka East Khasi Hills District.
Katkum kane ka hukum, u DEO u la ong, “la ïoh jingtip ba ki don katto katne ki briew kiba rah bun bha ka pisa ban thied ïa ki nongthep vote ba kin ai ïa ka vote bakordor jong ki sha u kyrtong. Lada ailad kum ïa kine ki jait kam, kan ktah ïa ka jingïaid beit bad ka jingkhuid jingsuba ka elekshon Lok Sabha 2024 bad ka lah ban pynmih ïa ka jingïakajia, ka jingïashoh ïadat hapdeng ki paidbah, kaba lam sha ka jingthud jong ka shongsuk shongssaiñ, ka jingduh ei ki mynsiem briew bad ki mar ki mata.”
U DEO u la mana ruh ban pynlong ïa ki jingïakhih kum ki jingshah thngan, ki proseshon, ki rally bad kiwei kiwei yn sa pynlong da ki katto katne ki kynhun bapher bapher hapoh ka district.
La mana ban dro ha ki kynroh, ban tah poster ne kot kino kino ki jingthoh ba pynjah burom, ban pynieng ïa ki cut-out, hoarding, banners ha ki jaka paidbah ne ha ki phyllaw ing jong ki paidbah khlem da ïoh jingbit na ki trai iing bad ka jingïoh jingmynjur na ka ophis u Deputy Commissoner.
La mana ïa ki seng saiñpyrthei ne kyrtong ban buh ïa ki banner ha surok ne ki jaka rung.
La mana ban pynlong ïa ki jingïalang khlem da ïoh jingbit na ka ophis u Deputy Commissoner bad na ki Rangbah Shnong. La mana ban pyndonkam ïa ki tiar jingpynsawa hapdeng ka por 10:00 baje mynmiet haduh 6:00 baje mynstep.
Lada pyndonkam ïa ki PA System/Loud Speaker khlem da ïoh jingbit yn kurup noh mardor da ki bor synshar district.
Yn ym shah ban pynlong ïa ki proseshon bad ki rally khlem da ïoh jingbit.
Kane ka hukum kan treikam noh mardor tad haduh ban da kut ka jingpynlong ïa ka elekshon.
