Lok Sabha Elekshon: 19 tarik Ïaïong yn thep vote ha jylla Meghalaya, ñiew vote 4 tarik Jylliew

Shillong, Lber, 16: Ka Election Commission of India (ECI) ha ka Sngi Saitjaiñ ka la pynbna ïa ki tarik ban pynlong ïa ka elekshon Lok Sabha.
Katkum ka jingpyntip jong u Chief Election Commisioner (CEC) Rajiv Kumar, ka elekshon ha Meghalaya kan long ha ka 19 tarik, Ïaiong ha ka Phase-I. Ka jingniew ïa ki vote kan long ha ka 4 tarik Jylliew.
Ka sngi khatduh ban thep kyrteng kan long ha ka 27 tarik, Lber bad 28 tarik, Lber. Ka tarik ban bishar ia ki kot ki sla kan long ha ka 28 tarik, Lber bad 30 tarik Lber. Ka sngi weng kyrteng ki kyrtong kan long ha ka 30 tarik, Lber bad 2 tarik, ïaiong.
U Kumar u la ïathuh ba ka jingpynlong ïa ka elekshon kan long haduh hynñiew sien ha baroh kawei ka ri. Ka Meghalaya kaba don ar tylli ki Seat ba kynthup ïa ka Shillong bad ka Tura ba hap ha ka Phase-I kan sa thep vote lang bad ki Jylla, kata, ka Arunachal Pradesh, Andaman &Nicobar Island, Andhra Pradesh, Chandigarh, DDN&H, Delhi, Goa, Gujarat, Himachal Pradesh, Haryana, Kerala, Lakshadweep, Ladakh, Mizoram, Meghalaya, Nagaland, Puducherry, Sikkim, Tamil Nadu, Punjab, Telangana, Uttarakhand, Karnataka, Rajasthan, Tripura, Manipur, Chhattisgarh, Assam, Odisha, Madhya Pradesh, Jharkhand, Maharashtra, Jammu & Kashmir, Uttar Pradesh, Bihar & West Bengal.
Da ka jingpynbna ïa ka tarik ban pynlong ïa ka elekshon ka Model Code of Conduct (MCC) ka la treikam mardor ha baroh kawei ka ri.
U CEC u la ïathuh ba ki don 96.8 klur ngut ki nongthep vote ha ka ri India bad 49.7 klur ki dei ki shynrang bad 47.1 klur ki dei ki kynthei.
U la ïathuh ruh na napdeng kine ki don 19.74 klur ki nongthep vote kiba hapdeng ka rta 21 haduh 29 snem.