Shillong, Lber, 16: Ka Meghalaya Joint Action Committee (MJAC) ha ka sngi Thohdieng ka la ujor sha u Chief Secretary ka Jylla u Bah Donald P. Wahlang bad kyntu ba un shimkhia ban tuklar lem halor ka jingkynnoh ba ki Pulit ki donkti ban dawa pisa na ki trok kit maw, mawria, dewbilat, dpei dewiong bad na ki trok kit marbam.
“Ka jingdon jong ki Police Outpost ha shilynter ka surokbah National Highway naduh East Jaiñtia Hil, West Jaiñtia Hills, East Khasi bad Ribhoi District ki dei ki jingpang ha ka jingïaid lynti jong ngi. Manla ka por ba ngi hap ban ïaid lyngba ïa kine ki Police Outpost ngi shah pynbor ban siew da ka dor kaba heh watla ka dei ka pisa kaba ngi hap ban pynlut ban thied bam ha ka jingïaid lynti. Don ki khep ba ngi hap ban shah jingit da ki sngi namarba ngi la lut ka pisa na ka daw jong kine ki Police Outpost. Kaba kham pynmong shuh shuh, kine ki Police Outpost kiba dei ban peit ïa ka shongsuk shongsaiñ, pynban, manla ka sngi ki dawa pisa na ki nongñiah trok,” ong ka dorkhas na ka MJAC ba la soi da u Chairman Bah Biangshwa Shylla, u Finance Secretary Bah Balen Thubru bad u General Secretary Bah Enrico D. Passi.
“Ki trok ki shah pynsangeh kumba 12 haduh 15 sien ha ki Police Outpost ba don ha ki surokbah National Highway kiba leh mynleh ban talasi ïa ka jingkit palat pud, ka jingshalan dewiong be-aiñ bad talasi ïa ki kot ki sla jong ki trok khnang ban ïohlad ban dawa pisa T.100 haduh T. 500 na kawei kawei ka trok kiba kit ïa ki maw, mawria, dewbilat, dpei dewiong bad na ki trok kit marbam,” la kynnoh ka MJAC.
“Wat haba rah ïa ki kot ki sla kiba biang ban kit ïa ki mar, ki Pulit ki dawa pisa nga ngi ha ka por mynsngi bad ha ka por mynmiet. Lada ki nongñiah trok ki kyntait ban siew ïa ka pisa ba ki shah dawa ki Pulit ki shoh ïa u nongñiah bad pynjulor ruh wat ïa ki trok bad ym shah hi ruh ïa ki trok ban ïaid,” kynnoh shuh shuh ka MJAC.
“Ka bym lah ban long ba u Pulit un dawa pisa khlem ka jingtip jong uba kham halor jong u. Hadien ba la pyntreikam ïa ka GST, ngi ngeit ba ki Pulit kin ym tuklar ïa ka kam jong ngi namarba ngi la pynbiang ïa ki kot ki sla kiba biang hynrei ngi shah pynbor ban siew ïa ka pisa watla bun na ki trok ki dei kiba don ïa ki kot ki sla kiba biang ban ïaid ha ki surokbah. Ym baroh ki trok ki ïakynduh jingeh. Ki don ki khep haba ki Pulit Traffic ki lah ban pynsangeh ïa ka Trok, hynrei ym dei ban shu pynsangeh lut naphang. Kum ka nuksa, shispah tylli ki trok kiba ïaid, bad u pulit u pynsangeh lut ïa ki. Hato kine ki trok kin mad lut ïa kajuh ka jingeh,” la buh jingkylli ka MJAC.
Ka MJAC ka la kam ruh ba wat hapdeng ka jingtalasi bad pynsangeh ïa ki trok kumba 12 haduh 15 sien hynrei ka jingshalan beaiñ ïa u dewiong ka dang don ha East bad ha West Jaiñtia Hills District. Haduh mynta, ki dang don byllai ki trok kit dewiong kiba kit ïa u mar sha ki jaka bapher bapher ka District, ka Jylla bad wat sha ka jylla Assam khlem sangeh.
“Kum kine ki kam yn ym lah ban leh khlem ka jingïada da ki bor sorkar. Kaba pynlyngngoh, ba bun na ki trok kit dewiong ki dei ki jong ki bahaing hasem ne kiba don ka jingïadei kaba jan bad ki briew kiba don ha ka bor,” la kynnoh ka MJAC.
“Ngi kyrpad ïa phi ban pynsangeh noh mardor ïa kine ki jingdawa pisa da ki Pulit ha shilynter ka surokbah,” la kyrpad ka MJAC ïa u Chief Secretary bad phah kopi ruh sha u Myntri Rangbah ka Jylla, sha u Symbud Myntri ka tnat Kam Pohing ka jylla bad sha u Director General of Police ka Jylla.
