‘Ngin ym pdiang da lei lei ïa ka CAA’, thang ka KSU West Khasi Hills ïa ki kyndon aiñ
![](https://mawphor.com/wp-content/uploads/2024/03/ki-dkhot-KSU-ba-dang-thang-ia-ki-kot-ain-CAA-Copy.jpg)
Nongstoiñ, Lber 13: Ka jingpyntreikam jong ka sorkar India ïa ka Citizenship Amendment Act, kaba la pynbna dang shen da u Amitshah u Myntri kam pohïing jong ka sorkar India, ka la pynkhih win biang sa shisien ïa ka Khasi Student Union bad ïa ki paitbah ha baroh kawei ka jylla.
Halor kane ka bynta ha ka janmiet jong ka sngi balang, ka Khasi Student Union West Khasi Hills District Unit ka la pynlong ïa ka jingïalang ha Nongstoiñ, ban pynshai paitbah bad ban pynpaw ïa ka jingpyrshah kaba jur halor ka jingpyntreikam ïa katei ka aiñ khyllah ka bym ïahap satia bad ka jinglong jingman jong ka Jaitbynriew Khasi bad Jaiñtia bad kiwei kiwei ki jaitbynriew kiba shong ha ki jylla ka thaiñ shatei lam mihngi.
Ha ka jingïalang ba la pynïaid da u samla Wanbhakupar Lyngdoh la ïadon ryngkat da u samla Johnfisher Nongsiang president ka KSU West Khasi Hills, u samla Franklin Syiemïong General secretary, u samla S.Kharbani Organising secretary Sengkmie, u samla Shemphang Marbañiang organizing secretary ka KSU Mairang circle, ki president bad secretary jong ki unit bad ki circle kiba don ha West Khasi Hills bad kiwei kiwei.
Haba ai jingkren ki la ong ba ha u snem 2019 ka sorkar India ka la pynbna ba kan sa pyntreikam noh ïa ka CAA lyngba ka mat kaba la tip kum ka Citizenship Amendment Bill. Hadien kata ka Lok Sabha kan sa phah sha ka Rajya Sabha bad lada ka Rajyasabha ka mynjur kan sa pyntrei kam noh.
Ki la ong ba naduh kitei ki snem ka KSU bad kiwei pat ki sengbhalang napoh ka jylla, ki la pynlong da ki jingïakhih kiba jur ban pynpaw ïa ka jingpyrshah. Hynrei ha kine ki khyndiat sngi kynsan kynsan ka sorkar NDA kaba la ïalam da ka BJP ka la pynbna bad Notified ba ïa katei ka aiñ la sdang ban pyntreikam.
Nalor kata ki la ong ruh ba ka jingpyntreikam ïa katei ka aiñ ka dei ka jingïuhroit ïa ka hok jong ki jaitbynriew rit paid kiba shong ha ki jylla ka thaiñ shatei lam mihngi. Ki la pynshai ba ki jylla ka thaiñ shatei lam mihngi kum ka Meghalaya, Tripura, Mizoram ki dei ki jylla kiba mar khap bad ka ri Bangladesh kumta ka jingpyntreikam ïa katei ka aiñ ka long kaba ma shibun.
Ki la pynshai ruh ba ha ki snem ba mynshuwa eh ki bar jylla kiba wan rung hapoh Meghalaya, ki wan tang kum ki nongbylla bad kiba wan trei ha ki ophis sorkar. Hynrei ha kine ki sngi ka sor Shillong ka la kylla long ka nongbah jong ki bar jylla suda, ha kaba ki bar jylla ki la knieh lut ïa ka kami kajih, ka bylla ka sngi, ka trei ka ktah bad ha baroh ki liang.
Kumta lada ailad ba katei ka aiñ kan trei kam ki khun ka bri u Hynñiewtrep, kin kylla long tang kum ki nongtong um ne ki nongthohdieng jong ki mynder. Ki nongïalam ka KSU ha katei ka jingïalang, ki la ong ruh ba kumba ka seng ka la ïeng pyrshah naduh ba sdang kan ïeng pyrshah beit haduh ba kut bad lada ka sorkar kan pyntreikam jubor ïa katei ka aiñ, na ka liang ka seng kam banse ban mih sha surok, ban pynlong da ki jingïakhih bad ban shim da kiwei pat ki lad ba kham tyngeh kampher wat lada kan poi haduh u pud jong ka jingïa um snam ruh.
Shuwa ban pynwai ïa ka jingïalang ki nongïalam bad ki dkhot ka seng ki la thang ïa ki kot ba ka sorkar India, ka la thoh ïa ki kyndon aiñ jong ka Citizen Amendment Act kaba yn sa pyntreikam noh hapoh ka ri baroh kawei.