U EE um dei ban tei pop ha ka IIT dei ban ai da ka kaiphod kaba bniah: Sawkmie

Shillong, Jymmang 22 : U MLA ka Mawlai Constituency u bah P.T Sawakmie u la pynpaw ka jingsngew khia jur halor ka jingkhyllem ka Dome ne maw mot pyllun ba la tei halor tnud ka ïing dorbar Assembly ba thymmai ha Mawdiangdiang hynne dang step synñia ha ka por kumba 12.30 ei ei bad donbok ba ka jia ha kum katei ka por ba ym shym la don ba iap ne mynsaw.
Halor kane ka jingjia haba kren ha u nongthoh khubor u bah Sawkmie u la ong “ U Executive Engineer PWD (Building) uba peit ïa ka jingtrei u bah Ransom Sutnga um dei ban tei pop ha ka IIT Rorkee kaba dro dur ïa kane ka jingtei ha kum kane ka por hynrei dei ban phah tohkit bad ai da ka Technical Report kaba bniah bad kaba shai”.
U la ong ruh “ Halor ka jingong jong u Engineer ba ka Dome ka la khia than , kumno u lah ban kynthoh kumne khlem da ïoh ïa ka kaiphod ne ka technical report kaba bniah. Kumta halor kane nga dawa na ka sorkar ba ka dei ban phah tohkit bad ai ïa ka kaiphod kaba shai kdar kumno kane ka jingkhyllem ka jia bad na kaei ka daw khnang ba ki paidbah kin ïashai”.
Na ka liang u bah Ransom haba kren sha ki lad pathai khubor ula ïathuh ba kane ka Dome ka khia kumba 70 ton ei ei bad ka jingjrong ka long kumba 78 phut ei ei bad na kata ka daw ba ka jingkhyllem ne twa ka jia namar ba la khia palat bad ka jingbym biang ka jingohdur. U la ïathuh ban pynkhuid ïa kane ka jaka ba la khyllem ruh kan shim por kumba 2 taiew ei ei. ïa katei ka jaka ba la pynshong iaka Dome la hap ban pynwandur biang da kumwei.
“ Mynta hadien ba la dro dur biang da kumwei yn sa tei pat da kawei ka rukom ka ban ym khia khnang ba kan ym jia shuh kum kane ka jingjia ha ki por ban sa wan” ong u bah Ransom.