Shillong, Lber 04 : Ka sorkar jylla ka la thung da ka jingtohkit magisterial inquiry halor ka jingshah siat ïap jong u rangbah ha ka sngi Thohdieng ba la dep ha ki BSF ha ka shnong Dalia kaba hap ha Shella-Bhologanj sub division, East Khasi Hills, ong ki tyllong khubor ha ka sngi Nyngkong.
Ïa kane ka jingtohkit la ong ba yn khlieh da ka Sub – Divisional Officer ka Sohra.
Katkum ka jingpyllait khubor na u SP ka East Khasi Hills, u Rituraj Ravi la ong ba kane ka la jia ha ka miet sngi Thohdieng ha ka por 8:00 baje ei ei hadien ba ka la don ka jingïa pyneh hapdeng ki BSF bad ki briew ki bym ithuh ha ka shnong Dalia kumba 150 mitar na u pud bad ka Bangladesh.
La ong ruh ba ha katei ka jingjia, ki BSF ki la siat sha ki paidbah bad uwei u briew ba tip kyrteng kum u Asen M Marak u la khlad. Ka jingtohkit halor kane ka jingjïa ban lap ïa ka jingshisha ka dang ïaid.
U Asen M. Marak, uba la don kumba 40 snem ka rta, u la duhei ïa la ka jong ka jingim ha ka jingsiat kuli jong ki shipai BSF katba ki paidbah ki dang pyrshang ban patan ïa u na ka jaka ba la jia ka jingïasiat, kaba jngai kumba 300 mitar na khappud, ka bym pat ker sainar shiah. Ïa uba la mynsaw, ki Pulit bad ki shipai BSF ki dang pynlong ka jingtohkit kaba bniah ban tip kyrteng bad ïa ka jaka sah.
Haba pynshisha ïa kane ka jingjia, ka Sub Divisional Officer (Civil) jong ka Sohra, ka Salon Verma ka la ong ba ïa kane ka kam mynta ka dang don hapdeng ka jingtohkit katkum ki kyndon jong ka aiñ. La iathuh ruh ba kane ka la jia ha ha shnong Dalia hajan Shella, East Khasi Hills District ha ka por kumba 8 baje mynmiet, haba ki shipai BSF kiba dang ïaid pahara ki la khang lynti ïa ka kynhun jong ki birew kiba thmu ban shalan tuh ïa ka shini, u piat bad ïa kiwei kiwei ki mar ha ka dor kaba rem sha ka ri Bangladesh.
Ka shnong Dalia ka dei kaba la buhai shnong da ki Garo bad ka thymmei khubor ka ïathuh ba ki kam runar ruser ki ju jia bha watla kam pat ju don satia kano ka jingïatakhuh bad ki bor jong ka aiñ ha ki sngi ba la leit noh.
Katkum ka jingai jingtip ba malu mala halor ka jingjia, u Heh Ophisar BSF uba shimti ïa kane ka kam u la ong ba kine ki jingjia ki ju jia manla ka por, hynrei ha katei ka sngi ki la don kumba 300 ngut ki briew na India bad Bangladesh ki la ïatakhuh bad ki shipai BSF katba ki dang pyrshang ban pynpulom ïa ki kam khaïi tuh bad khnang ban pynjem ïa ki paidbhur ki shipai BSF ki la siat ar kuli ha kaba u Asen Marak u la ïap.
