Shillong, Jymmang, 20: U Myntri Rangbah ka Jylla u Conrad Kongkal Sangma ha ka sngi Thohdieng u la khot ïakren ïa ki nongïalam jong ka Khasi Author Society (KAS) bad ka A’chik Literature Society (ALS) na ka bynta ban ïathir sani ha kaba ïadei bad ka jingbuddien ïa ka Resolution ba la phah sha ka Ministry of Home Affairs, ka Sorkar India ban pynrung ïa ka ktien Khasi bad Garo ha ka Khyrnit Baphra jong ka Titi Synshar ka ri India.
Ha kane ka jingïalang u Myntri Rangbah u la ïathuh ba ka jingthmu jong kane ka jingïalang ka la long ïathir sani halor ka jingbuddien na ka Sorkar India ban pynrung ïa ka ktien Khasi bad Garo ha ka Khyrnit Baphra bad ban ïathir ruh ïa ki lad ki lynti kiba ka Sorkar kan kyntiew ïa kine ki ar tylli ki ktien hapoh ka jylla khamtam ha ki samla.
“Ha ka jingïathir, ngi sngew ba ka long kaba donkam ban kyntiew ïa ki ktien jong ka Jylla ym tang lyngba ka thoh ka pule, ki jingïathir nia, ki jingïatai, hynrei lyngba ki phlim bad ki jingrwai bad kiwei kiwei de ki lad kiba lah ban kyntiew ïa ka ktien,” ong u Myntri Rangbah.
La ïashim bynta lang ha ka jingïalang da ka Chief Secretary ka Jylla ka Kong Rebecca V. Suchiang, u Commissioner and Secretary jong ka tnat Arts and Culture u Bah FR Kharkongor, u Secretary ka tnat Home (Political) u Bah Cyril V. Diengdoh bad kiwei kiwei.
U President jong ka Khasi Author Society (KAS) u Dr. DRL Nonglait ha ka jingïakren bad ki lad pathai khubor hadien ba la wai ka jingïalang bad u Myntri Rangbah u la ong, “ka jingslem jong ka ktien Khasi ban ïoh rung ha ka Khyrnit Baphra jong ka Riti Synshar ka Ri, ka dei namar ba ka jingbym shimkhia bad ka jingleh sting jong ka Sorkar jylla ban buddien ïa kane ka mat jingdawa kaba la palat 40 snem kynthih.”
“Ngin ap katto katne por ïa ka Sorkar Jylla ba kan buddien ïa kane ka kam bad lada ngim ihun ïa ka jingbuddien jong ka Sorkar khlem pep ngin sa pynlong ïa ka jingïalang paidbah kaba heh,” ong u Dr. Nonglait.
Ha kaba ïadei bad ka jingkyrpad jong ka Sorkar Jylla ïa ka Ministry of Home Affairs (MoHA) naduh u Nohprah 2018 ban pynrung ka pynrung ïa ka ktien Khasi bad ktien Garo ha ka Khyrnit Baphra, u Dr. Nonglait u la ong, “baroh shikatta ka jingdawa ka long beit tang ban pynrung ïa ka ktien Khasi hynrei mynta ha kane ka kynti mynta ka Sorkar ka la rai ban pynrung lang ïa ka ktien Garo.”
“Lada ka Sorkar Jylla kam don kano kano ka jingleh kyllaiñ bad lada ka phah beit ïa kine ki jait Ktien na ka jylla bad ban shaniah beit ha ka tnad Kam Pohiing ka Sorkar Pdeng na bynta ban peit ïa ka kyrdan jong kine ki artylli ki jait ktien khlempep ka ktien Khasi kan nym don jingduna satia kano kano ka jingthut.
“Hynrei lada don noh ka jingtuklar ba dei ban ïoh baroh ar tylli ki jait ktien, lehse hangne ka lah ban don ka jingeh bad na ka liang jong ngi. Ngin sa peitngor ha kaba ïadei bad kane bad ngin ym sngewtynnad ba kawei ka ktien kan khanglad noh ïa kawei ka jait ktien,” la kren sngewkhia u Dr. Nonglait.
Shuh shuh u la ïathuh ba ha u snem 2019 ha ka jingïakynduh jong ka KAS ïa u Rajnath Singh mynba u dang long u Myntri ka tnat Kam Pohing bad ïa u Myntri Khynnah u Kiren Rijiju bad na ka liang jong ka Sorkar India ka la phah jubab ba ka ktien Khasi ka long kawei na ki 38 tylli ki ktien ha Ri India kiba la dawa na bynta ban pynrung ha ka Khyrnit Baphra bad kine baroh ki dang don hapoh ka jingpeit bniah jong ka tnad Kam Pohiing ka Sorkar India.
U la ïathuh ba ha ka jingïakynduh jong ka KAS ïa u Myntri ka tnat Kam Pohing u Amit Shah, u la kular ba un sa bishar bniah ïa kane ka kam hynrei haduh mynta ka Society kam pat ïoh jingtip eiei na ka Minitry of Home Affairs.
“Ngi dawa ba u Myntri Rangbah ka Jylla udei ban buddien hangno ka ktien Khasi ka dang sahdien haduh mynta bad ngin ap katto katne por ïa ka jubab na ka tnad kam Pohiing ka Sorkar Pdeng bad lada ngim ïoh ïa ka jubab ngim banse ban leit biang sha Delhi ban leit buddien,” la ïathuh u Dr. Nonglait.
“Ngi la batai ha ka jingïalang ba la khot da u Myntri Rangbah mynta ka sngi halor ki kam kiba ka KAS ka la trei radbah da kaba ju pynmih artylli ki thup jingthoh wad bniah bad na ka liang jong ka Sorkar ka la ong ba la donkam ban pynmih sa kawei ka thup jingthoh ka ban pynmih hi da ka tnad Arts &Culture,” ong u President ka KAS bad bynrap, “ngi la pdiang ïa ka jingtyrwa bad lehse kane kan long kawei ka thup jingthoh ka ban kynthup lang ka ktien khasi bad Garo.”
U la ïathuh ba ka Society ka la dang pynkhreh ïa kawei ka Documentary na bynta ban phah sha ka Ministry of Home Affairs lyngba ka Sorkar Jylla khnang ban pynpaw ïa ki kam kiba ka Society ka la trei ha kine ki sawphew snem ba la leit noh.
Ka KAS ka la kyrpad ruh ïa ka Sorkar Jylla ban pynïoh jaka na ka bynta ban buh ïa ka iing treikam ba thymmai ha nongbah Shillong bad u Myntri Rangbah u la bthah ïa ki Ophisar jong ka tnat Arts and Culture ban shimkhia halor kane ka jingtyrwa.
