Khliehriat, Rymphang, 25: Ki thylliej ding barhem ki la bamduh ïa ka ïingsah jong ka Kong Ribiang Phawa ha ka shnong Tuberkmaishnong, East Jaiñtia Hills District ha ka sngi u Blei.
Watla kane ka ïing ka la pluh ha ka por kumba 2:00 baje mynstep hynrei donbok ba ym shym la don ba mynsaw.
“Baroh ki jingdon jingem hapoh ka ïing ki la kylla dpei lut namar ka jingklang jong ki thylliej ding bad bam duh ploiñ ïa ka ïing ka sem bad ki jingdon jingem baroh kiba don hapoh ïing,” la ïathuh u Waheh Shnong ka Tuberkmaishnong Bah Miki Lyngdoh.
“Ka ding ka la sdang ha ka por kumba 2:00 baje mynstep hynrei ym shym la don kano kano ka jingjia basngewsih ha kane ka jingpluh ïing hynrei tang ka jingduh noh ïa ki tiar kiba don hapoh ïing,” ula ong.
Na ka liang jong ka Dorbar Shnong Tuberkmaishnong khot bad wer ïa baroh ki nongshong shnong jong ka shnong ba kin mih shakhmat ban ïarap lem ïa kane ka longiing jong ka Kong Ribiang Phawa kaba la ngat ha kane ka apot pluh ïing.
Ka Khasi Students Union (KSU) East Jaiñtia Hills District Unit tang shu ïoh jingtip halor kane ka jingjia mar mar ki dkhot ka seng hapoh ka jingïalam jong u President Bah Streamly S. Suchen bad u Finance Secretary Bah Shaniahskhem S.Dkhar ki la leit ban ai jingïarap ïa ka longïing jong ka Kong Ribiang Phawa
Ka KSU ka la kyrpad ruh ïa ki paidbah lane ki riewshimet ba kin don ïa ka mynsiem ban ïarap ïa kiba ngat ha ki jingjia bapher bapher da kaba wan shakhmat ban ïarap lem ïa ki.
