Nongstoiñ, Rymphang 25: Ka jingpynkylla jong ka tnad ka pule puthi ïa ki kot pule jong ki khynnah skul, ka la ktah jur ïa ki kmie ki kpa ba kin leit ban wad kot na ki dukan. Namar bun kim ju ïoh ha ki por kiba dei biang bad bunsien la shu phai thylli namar ka jingbym ïoh.
Ki katto katne ngut ki kmie ki kpa jong ki khynnah, ki la pynpaw ba ki da syllang ban wad kot na ka bynta ki khun wat haba ki ju leit man la ka sngi ruh, khamtam kiba wan na ki shnong nyngkyndong lei lei ki la ud la nam, namar kim lah ban wan man ka sngi na ka daw ka jingbym don kali. Pynban wat haba ki ïoh ïa ka lad ban wan khnang man ka sngi ïew phewse ki ïoh tang wei ne ar tylli bad don ruh ki por kiba ki hap ban phai thylli.
Shuwa ban pynkylla ha ka jingshisha lah dei ban pynbiang lupa ong ka kong M.Marshillong kaba la wan khnang naduh ka shnong Riangpoit kawei na ki shnong kaba na ka thaiñ Maweit ka shnong kaba ju don kali tang ha ki sngi ïew.
Uwei u rangbah u la ïathuh ba ki don ki nonghikai kiba pynshitom ïa ki khynnah skul lada kim rah ïa ki kot, hynrei haba ki kot kim don ha ki dukan ïew balei ki nonghikai ki pynshitom ïa ki khun.
U Bah S.Marweiñ u ba ju die kot skul la kumba 20 snem ei ei, u la ong ka daw bym ïoh kot ka long naduh ka kudam na sor Shillong. Kane ka ktah shisha ïa ki kmie ki kpa bad ïa ki khynnah skul, don ki por la ïoh tang 100 tylli bad tang shiphang lah lut.
