Hato ki Nongbishar ba la shongthait ki dang ïoh ïa ka kyrdan VVIP, kylli ka Liang Pyrshah
![](https://mawphor.com/wp-content/uploads/2024/02/celestine-Copy.jpg)
Shillong, Rymphang 21 : U MLA ka Congress na Umsning u Dr Celestine Lyngdoh ha ka sngi Balang ula buh jingkylli la ki Judge bala shongthait ki dang bteng ban long ki VVIP hapoh ka Jylla.
Haba wanrah ïa ka jingkylli bynrap ha ïing Dorbar, u Dr Celestine ula ong ba daw ba pynlong ïa ki ban kylli ïa kane ka jingkylli ka dei namar haba ki leit sha Meghalaya House, la ju pyntip sha ki ba ïa kata kata ka kamra la buh na ka bynta ki Nongbishar bala shongthait.
Ula ai jingmut ruh ba donkam ban bishar thymmai ïa ki jingmyntoi ba la ai sha ki Nongbishar bala shongthait. Kat kum ka jingong jong u, kan long ka jingkit kaba khia ïa ka Jylla ba rit kum ka Meghalaya lada ka ai ïa ki juh ki jingmyntoi wat sha ki Nongbishar ba wan tang lai bnai bad mih noh na ka jingshakri ha ka High Court ka Meghalaya.
Haba jubab ïa kane, ka Myntri ka Tnad Aiñ ka Kong Ampareen Lyngdoh ka la ong “Baroh kine ki jingmyntoi ba la ai sha ki Nongbishar ki dei kiba la buh da ki aiñ ka Parliament. Ngi hap ban bud ïa kine ki kyndon bad ruh ïa ki katto kane ki hukum jong ka Supreme Court kaba la ai jingmut ïa kine ki jingmyntoi”.
Shuwa kane, ka Myntri ka pyntip ba ka Secretariat Assistance bad Domestic Help Allowance sha ki Chief Justice ba la shongthait ka long T. 50,000 bad ki Judge ba la shongthait ka long T. 40,000.
Kat kum ka jingong jong ka, ki juh ki jingmyntoi bala ai da kiwei ki Jylla ka Ri sha ki Justice bad Judge ba la shongthait ba sah satang lai bnai ha ka jingshakri, yn ai ïa ki juh ki jingmyntoi.