Da ka skhim ba thymmai pynbna u CM ban ïarap ïa ki samla pule ha ki kyrdan ba shalor

Shillong, Rymphang 21 : U Myntri Rangbah ka jylla u Conrad K Sangma mynta ka sngi Balang u la pynbna ïa ka skhim kaba thymmai ba ka sorkar kan pyntreikam ban ïarap ïa ki samla pule ha ki kyrdan ba shalor.
Haba ai jingkren halor ka Mang Tyngka jongka sorkar jylla u Myntri Rangbah u la ong ba yn sa pyntreikam noh da ka Chief Minister’s Scholarship Scheme naduh u snem 2024-2025 na ka bynta kito ki samla pule kiba pass bha shakhmat ha ki kyrdan Class XI bad XII. “ Ka sorkar kan pyntreikam ruh ïa ka prokram kaba thymmai ban ïarap ïa ki samla pule kaba la jer kyrteng ka MPOWER da kaba la mang ruh 380 klur tyngka na ka bynta kane” ong u Myntri Rangbah.
U Myntri Rangbah u la ïathuh ruh ba ka sorkar la la leh da ka pali ban pynbha ïa baroh 2044 tylli ki skul sorkar lynba ka Umbrella of Mission Education ha ka jinglut kaba 326 klur tyngka.
U la ïathuh ka jingpynbha bad pynthymmai la lah ban pyndep ha ki 220 tylli ki Secondary bad Higher Secondary School bad ka jingtrei mynta ka dang ïaid ha ki 100 tylli ki skul.
Nangta u la ïathuh sa kumba 1,725 tylli ki skul ka jingpyntrei ka dang ïaid ha la ki bynta bynta.” Kan long kaei kaei kaba sngewtynnad ba la kumno kumno ruh haba kut jong u snem ban wan baroh ki skul sorkar kin biang lut nadong shadong” ong u Conrad.
U la pynbna ba yn sa pyntreikam ruh ïa ka Mission Education 2.0 ha u snem 2024-2025 bad ka thong ka long ban pynbiang naduh ka bording, ka umdih, ki painkhana bad kiwei kiwei ki jingdonkam ha ki skul sorkar. Khnang ban khring ba pynbyrngia ïa ki samla pule, ki khynnah skul bad kiba la pule ha ki kyrdan ba shalor ruh ka sorkar ka la pynkhreh ïa ka projek ba kyrpang ban tei ïa ki Library na ka bynta jongki bad ïa kine yn tei ha ki 750 tylli ki shnong ha ka jingmang tyngka kaba 162 klur.
Lyngba ka Early Childhood Development Mission u myntri rangbah u la ïathuh ba ka sorkar ka la mang ban kyntiew kyrdan ïa ki 2148 tylli ki Anganwadi Centre bad ban plie ruh ïaki Centre kiba thymmah ha ki 1500 tylli ki shnong. La mang 500 klur tyngka na ka bynta kane hapoh kine ki san snem ban wan.