Ym kotbor ka Sorkar ban thied jaka ban pynneh pynsah ïa ki dieng ha ki tyllong umdih

Shillong, Rymphang 21 : U Myntri Rangbah ka Jylla Conrad K Sangma ha ka sngi Balang ula pynpaw ïa ka jingbym kot bor jong ka Sorkar Jylla ban thied jaka ha ka ban ai jingïada ïa ki khlaw ba hap hapoh ki Catchment Area ne ki jaka ba ki tyllong umdih ki don.
Haba jubab ïa ka jingïatai halor ka jingkren u Lat, u Conrad ula ong “Watla ka jingtyrwa ban thied ïa ki ki jaka ha ki catchment area ka dei kaba biang eh hynrei ka jingdonkam pisa ka long kaba bun bah bad ngi lehse ngim ym lah ban leh ïa kane”.
U Conrad ula pyntip ruh ba ka Sorkar jylla ka la mang 344 klur tyngka hapoh ka Megh-Arise ban ïada ïa ki catchment area ha Shillong bad ha Tura.
“Namar kata, ngin pyrshang ban buria ïa ka jinglutksan ki trai jaka naba ka dor ban thied ïa ka jaka ka long kaba heh bha” ula ong.
Halor ka jingkynrei u droks, u Myntri Rangbah ula pyntip ba haduh 696 tylli ki case la dep ban chargesheet bad palat 14000 gram u heroin bad 2700 gram u opium la ïoh ban kurup.
“Khnang ban pynsangeh ïa ka jingwan rung u droks, ngi lah thaw ïa ka DREAM Project ban leh eiei halor kane ka kam” ula ong.
Haba kren halor ka jingjaboh ka lyer ha Byrnihat, Ri-Bhoi, u Conrad ula ong ba ka jingpynduh noh ïa ki licence ka lah ban nym dei ka lynti ban ïaid shakhmat namar ka Jylla ka dang phaikhmat sha ka jingwan seng kam hynrei ka sorkar ka lah ban pyntreikam da ka jingdaiñ kuna ïa kito kiba pynkheiñ aiñ.
Ula kular ruh ban sa shimkhia mardor ïa ka jingujor halor ka jingsam ïa u khaw tad dor sha ki paidbah.
U Myntri Rangbah ula pyntip ruh ba ka song pisa ba T.5000 klur bala tyrwa ban pynlut sha ka New Shillong Administrative City khlem pep kan pynkylla dur ïa ka Nongbah jong ka Jylla.