Khliehriat Rymphang 21: Ka Mihmyntdu Community Social Welfare Association (MCSWA) hynnin ka sngi ka la pynlong ïa ka prokram ai jingpynshai halor ka jingshyrkhei u drok bad kino kino ki jingkyrni kiba pyn buaid, kane ka prokram ka dei shibynta jong ka campaign, ka Nasha Mukti Abhyan kaba la pyllait da ka sorkar India kaba don ka thong ban pynlong ïa ka ri India kaba lait na ki jingdih pyn buaid khamtam kaba lait na ka jingkyrni ïa u drok, ïa ka prokram la pynlong ha Dkhiah Secondary School East Jaiñtia Hills District.
Haba kren ha ka jingïalang, ka Master Volunteer, kaba dei ruh ka Manager jong ka MCSWA, ka kong Rinibet Patlong ka la kren bad pynshai shaphang ka jingktah bad ki jingsniew kiba mih na ka jingdih drok, la ong ba ka jingdih drok ka ktah ïa ka koit ka khiah, ïa ka jingmut jingpyrkhat, ka ktah ïa ka im lang ka sah lang , ka ktah ruh ïa ka ioh ka kot namar na ka daw u drok bunsien ki ju mih bun jait ki kam sniew kiba ju pynshong syier ïa ka im lang ka sah lang, kiba pyndonkam drok ki kylla long mraw ha u drok, haba la kyrni ka pynlong ïa u briew ban ioh ïa u khñiang jingpang HIV bad lada shim sting ban shim ïa ki lad jingsumar kan kylla sha ka jingpang AIDS kaba pyntlot ïa ka bor met bad thaw ïa ki jingpang ba bun jait ha ka met.
Ka kong Patlong ka la batai ruh kumno ban iada ban lait na ka jingsaphriang u khñiang HIV, ka la ong ba dei ban kiar na ka shongkha pathar, ban kiar na kaba pyndonkam da u juh u thyrnia injek, ka kyntu jur ïa ki khynnah samla ba ki dei ban kiar na ka jingdih drok bad ba ym dei da lei lei ruh ban ngop ha ka jingdih drok namar shi sien ba la ngop ka long kaba eh ban lait, ka kyntu ruh ïa ki khynnah ba ki dei ban long kiba khlaiñ ha ka bor jingmut jingpyrkhat bad ban don ka jingmut kaba skhem ban ong Em ïa u drok bad ruh ban kiar na kaba shongkha pathar.
Ka la kren ruh halor ka jingsniew kiba mih na u drok, bunsien na ka daw u drok ki mih bun jait ki kam sniew ba pynshong syier ïa ka imlang ka sahlang, u drok u ktah ruh ïa ka shong suk shongsaiñ ha ka imlang sahlang.
Kane ka campaign, ka Nasha Mukti Abhyan ka dei kaba la pyllait paidbah da ka sorkar pdeng lyngba ka Ministry Of Social Justice & Empowerment bad ha East Jaiñtia Hills District la pyllait da u myntri ka sorkar jylla, u bah Kyrmen Shylla myn ha ka 2 tarik u bnai jylliew 2023, naduh kane ka sngi bad haduh mynta ka kynhun jong ka MCSWA ka khlem shong kli kti hynrei ka la pynlong ïa ki prokram ai jingpynshai sha ki shnong bapher bapher bad sha ki skul bapher bapher kiba don hapoh ka district ban ialap paidbah shaphang ka jingshyrkhei u drok bad ka jingpang AIDS bad ruh ban iakhun ban poi sha ka thong ban pynlong ïa ka ri India kaba lait na u drok bad ki jingkyrni ha kaba dih pyn buaid.
Ia katei ka prokram la pynïaid da ka Principal jong ka Dkhiah East Secondary School, ka kong Luciana Nongtdu bad la ïa don lang ruh ki khynnah bad ki nonghikai jong katei ka skul, ïa kaba kum kane ka prokram ka MCSWA kan nang iai bteng na ka por sha ka por.
La pynlong ruh ïa ka jingiakop dro dur bad la ioh ruh ban sam ïa ki prize sha kito ki khynnah kiba jop ha ka jingiakop.
