Jur ka jingkyrduh um ha Mawsynram, ka shnong ba jur slap tam ha ka pyrthei
Hap leit sait pliangja ki paidbah sha wah
![](https://mawphor.com/wp-content/uploads/2024/02/MAWSYNRAM.JPG.jpg)
Shillong, Rymphang, 18: Watla shnong Mawsynram ka dei ka shnong kaba la bna nam ha ka jingjur slap ha ka pyrthei hynrei ka long kaei kaei kaba sngewlyngngoh ban tip ba ki paidbah nongshong shnong ki hap ban mad ïa ka jingkyrduh um.
Ïa kane la pyntip da u Bah Banshai Marbaniang uba long u nongtrei mon sngewbha ha u kyrwoh ba la phah sha ki lad pathai khubor ha ka sngi Saitjaiñ.
“Ki paidbah ka shnong Mawsynram ki la ïam bad ki lynñiar namar ka jingkyrduh um kaba la ktah kat haduh ba ki hap ban rah ïa la ka jong ka pliangja sha wah ban leit sait. Ynda nga la shem bad lap da la ki jong ki khmat ba la hap ban shu thied ïa ka umbam umdih na kiwei pat ki jaka. Kane ka la buh jingeh bad ka la ktah khamtam ïa ki paidbah ki baduk ba kyrduh haduh ba kim lah shuh ban thied ïa ka umbam umdih,” la ong u Bah Marbaniang.
“Kiba bun na ki paidbah ki la pyrshang ban thied ïa ka um ha ka dor kaba rem da kaba la sakhi ba ki nongtong um kiba wanrah ïa ka umbam umdih ki hap ban leit kit na jngai haduh ba ka um ka shongdor kumba T. 1,000 shishar tang kumba 1,000 ,” u la ong.
“Ha kine ki sngi nga la leit ban pynsngew ha u Executive Engineer (EE) kumjuh ruh ha u SDO ba dei khmih ïa ka thaiñ Mawsynram lyngba ka ka tnat Public Health Engineering (PHE) ha kaba ïadei bad ka jingeh kaba ki paidbah nongshong shnong ki ïakynduh khamtam ha kum kane ka aiom tlang kaba ktah jur ïa ki longiing longsem ki baduk bakyrduh,” u la ong.
U la ïathuh ba ka jingujor ha ka tnat PHE ka long halor kaei ka daw kaba la wanrah jingeh ïa ki paidbah jong ka thain ban kyrduh um haba ka pyrthei kylleng sawdong ka tip bad sakhi ïa ka shnong Mawsynram kum ka shnong ba jur slap ha pyrthei.
“Nga la kylli halor ka jingwan jong ka Jal Jeevan Mission ba balei ka pynlong haduh katne watla pyntyllun ïa ki kam ban trei?,” u la buh jingkylli.
“Ka jubab na ka tnat PHE ka long namarba dang duna palat ki jaka pynlang um kum ki tyllong umbam umdih ban ïoh hapoh ka shnong Mawsynram kaba la pynlong haduh ban wanrah ïa ka jingkyrduh um. Nalorkata, u Engineer u la ong, hapoh ka shnong Mawsynram ym shym la ïohlad lyngba ka JJM ban shna ïa ki tyllong um ne ki jaka ban ring um hynrei la thaw thymmai tang ki Top Um ban shu rung um sha ki thliew iing jong ki briew,” la ïathuh u Bah Marbaniang.
U la ïathuh ruh ba u Engineer bad u SDO ka tnat PHE ki la kular ba kin pyrshang ban wad ïa ki lad ki lynti kumno ban wad ïa ki tyllong um na ka bynta ban pynpoi ïa ka um sha ka shnong.
“Nga ladep ban pynsngew teng sha ka Dorbar Shnong Mawsynram halor ka jingeh kaba ki paidbah ki ïakynduh haduh wat tang ban ïoh pyndonkam noh sa tang ar ne lai tylli ki wah Shnong ban leitsum leitsait, hynrei kumba nga sakhi haduh kat kine ki sngi ba mynta ka dang ïai sah kumjuh khlem da shimkhia eiei ruh em lyngba ka shnong namarba la bun ki riewsaiñ pyrthei kiba la pynlong noh kum ka tnat Khaii ïa ka rukom synshar paidbah,” u la ong bad bynrap, “nga la pynsngew ruh ïa kane sha ka skhor jong u MLA Bah Olan Sing Suiñ bad ha u MDC Bah Alvin K. Sawkmie ba kin shimkhia da kaba wad ïa ki lad ki lynti kumno ban weng ïa ka jingeh jongki paidbah jong ka Constituency.”