Ka jingkhang ka dang plie ïa ka HNLC ban bteng ïa ka jingiakren ïasuk: Dy. CM

Shillong, Rymphang 13 : U Symbud Myntri Rangbah ka jylla uba dei peit ïa ka tnad kam pohïing u bah Prestone Tynsong u la ong ba ka jingkhang jongka sorkar pdeng bad ka sorkar jylla ka dang ïai plie beit ïa ka seng Hynniewtrep National Liberation Council (HNLC) ban bteng ïa ka jingïakren ïasuk.
“ Na kata ka daw ngi dang ïai kyntu bad khot sngewbha ïa ka seng HNLC na ka liang ka sorkar jylla ban ym sangeh ïa ka jingkren ïasuk hynrei ban ïai bteng haduh ban da poi sha ka thong namar dei tang ka miej jingïakren ïasuk kaba lah ban poi sha ka jingïasngewthuh jingmut lang” ong u Symbud Myntrui Rangbah haba ïakren bad ki nongthoh khubor.
U la kyntu ïa ka seng HNLC ban pyrkhat sani bha halor kane ka kam da kaba ong “ Nga ban biang ïa ka seng HNLC ban bteng ïa ka jingïakren namar ka jingkhang ka dang ïai plie beit. Pyrkhat bha sa shisien bad rai rangbah bad pyrkhat ruh ïa ka lawei bad pateng ban wan”.
Haba kren halor ki khubor social media ba la pynmih da ka seng HNLC kaba ong ba ka dei ka kam leh drama, u bah Prestone u la ong “ Kumba nga la pynshai kham mynshwa nga pynshai biang mynta ruh ba lada ki nongïalam ka seng HNLC ki sheptieng namar la dep pynpaw ba ki nongïalam kum u Chairman lane Commander- in- Chief ki lah ban ym wan ïakren namar ba ki sheptieng ïoh shah kem, nalor ba ngi la dep kular ba ka lynti ïaid jongki kan long kaba shngaiñ kim dei ban sheptieng, kumta lada ki kwah ban ïakren sha kawei ka jaka ym ha Meghalaya ruh ngi long kiba kloi ban pdiang bad ai kin rai ne buh ma ki ïa ka jaka ruh. Hynrei haba nga kren ïa kane kam mut ïa ki ba kin thoh ha ki social media ba ki khot ïa u Prestone ban ïakren namar kane kam long kaba dei ne ‘official’. Namar kat kane ka kam ym dei tang u Prestone uba khot ïa ki dei ka sorkar India bad ka sorkar jylla kiba khot ïakren ïa ka seng HNLC”.
U bah Prestone u la ïathuh ruh ba kat haduh mynta ym pat ïoh jingthoh ei ei ruh em na ka seng HNLC halor ka rai jong ki ha kaba ïadei bad kane ka jingkyntu bad kyrpad ka sorkar ban bteng ïa ka jingïaren ïasuk.
“ Ngam don ei ei ban ong, ngam lah ban ong ei ei hynrei na ka liang ka sorkar nga kwah ban ong tang kawei ba ka jingkhang ka dang plie bad ngi ïai kyntu bad kyrpad ïa ka seng ban bteng ïa ka jingkren ïasuk” pynkut u bah Prestone.