Mumbai, Rymphang 10: U rangtied ba kynsai jong ka kynhun India- u Virat Kohli un sa duh ban mih madan ha ka Test series ka ban long pyrshah ïa ka England namar ki daw ba shimet.
U Kohli, 35-snem, u ba dei u kapten barim ka kynhun, dang shen u la weng ïalade na ka thup kynhun ha ki ar tylli ki jingïalehkai Tests ba ladep.
Ka Board of Control for Cricket in India (BCCI) ka la pynbna hynnin ka Sngi Saitjaiñ ba u Kohli ruh un nym mih madan ha kane ka Test kaba lai pyrshah ïa ka England.
“U Virat Kohli un nym lah ban don bynta ha kane ka Test series ka ba dang sah namar ki daw ki bym lah kiar,” la ong ka BCCI lyngba ka jingpynbna.
“Na ka liang jong ka board ka pdiang bad ka burom ïa kane ka rai na u Kohli.”
Hadien ba u khlem shym la lah ban don bynta ha ki ar tylli ki Test ba ladep, ka board ka la pynpaw “ba ki don ki daw kiba ym lah ban kiar bad ka donkam ïa ban donryngkat bad kiba haïing ha sem”.
U Kohli, u ba la ïalehkai 113 sien ki Test na bynta ka India, u wan ha ka kyrdan ba saw na ka thup ki rangïalehkai ba kamai bun ron ïa ka ri ha ki jingïalehkai Test, kata da 8,848 ron.
Kumba ka long mynta kane ka Test series hapdeng ka India bad ka England ka dang ïakhaid da mar 1-1 bad ka dang sah sa lai sien ïakhun, ha kaba ïa ka Test ba lai kan long ha Rajkot la Sngi Palei, 15 tarik Rymphang.
U Kohli, u ba la ïalam ïa ka kynhun ha ki 68 tylli ki Tests hapdeng u snem 2014 bad 2022, u khlem pat shym la duh ban mih madan ha ka Test na bynta ka India la kumba ar snem, ka sien kaba khadduh ba un shah weng na ka kynhun ka dei pyrshah ïa ka South Africa ha Johannesburg namar ka jingmynsaw, ha u Kyllalyngkot snem 2022.
Kumban shu pynkynmaw, ka India ka la jop ïa ka Test kaba ar da 106 ron ha Visakhapatnam ha ka Lah Sngi U Blei ban pynïakhaid ïa ka series.
U (Batter) Shreyas Iyer, u ba la mih madan ha baroh ar ki Test kiba la dep, u khlem shym la paw kyrteng ha ka thup ki 17-ngut na bynta ka series kaba dang sah.
U Ravindra Jadeja bad u KL Rahul, kiba ïoh mih madan ha ka Test ba nyngkong, ki la shah jied na bynta ka Test kaba lai “hadien ba la ïoh jingbit na ka BCCI medical team”, la bynrap ka Board.
Ka kynhun jong ka India na bynta ka Tests Series ba dang sah ki long: Rohit Sharma (capt), Jasprit Bumrah, Yashasvi Jaiswal, Shubman Gill, KL Rahul (wk), Rajat Patidar, Sarfaraz Khan, Dhruv Jurel (wk), KS Bharat (wk), Ravichandran Ashwin, Ravindra Jadeja, Axar Patel, Washington Sundar, Kuldeep Yadav, Mohammed Siraj, Mukesh Kumar, Akash Deep.
