Shillong, Rymphang, 8: Ka Joint Action Committee (JAC) ha ka sngi Palei ka la byrngem ban ïalam biang da ki khun ki hajar ka Hima Sohïong lada ka Khasi Hills Autonomous District Council (KHADC) ka dang ïai bteng ban pynneh biang ïa ujuh u Lyngdoh ba la shah sospon hadien ki jingshah ujor kiba bun khamtam ha kaba ïadei bad ki jingkynnoh ba la pyndonkam bakla ïa ka pisa ka Hima.
Ha ka jingïakren bad ki lad pathai khubor, u Chairman ka JAC Bah Purningstar Shabong u la ong, lada don ruh na ki Myntri, ki nongïalam shnong ne kino kino kiba kyrshan ban dang thung biang ïa u Lyngdoh barim kin tur beit sha KHADC ban dawa ba dei ban weng beit na ka shuki Lyngdoh.
Ïa kane u la pynpaw ha ka jingleit pynkynmaw ïa u Deputy CEM i/c Elaka ka KHADC u Bah PN Syiem halor ka jingdawa ban weng noh ïa u Bah Bashemphang Thabah na ka khet Lyngdoh jong ka Hima Sohïong bad kyrpad ïa ka Council ban ai kopi ïa ka Inquiry Report halor ka jingtohkit pyrshah ïa u Bashemphang Thabah halor ka jingdawa jong ka JAC.
U la ong ba ka JAC ka la dawa ban pynlong da ka elekshon ban jied ïa u Lyngdoh uba thymmai bad ba pura jong ka Hima Sohïong.
Ha ka jingïakynduh bad u Deputy CEM, u la ong kum ki Khun ki Hajar ka Hima Sohïong ka kwah ruh ban pynkynmaw ba ka ka Joint Action Committee naduh u snem 2019 ka ladep ban ujor pyrshah ïa u Bashemphang Thabah halor ki kam be-aiñ be-riti jong u bad ka la dawa ban sospon bad ban weng noh ïa u na ka khet Lyngdoh ka Hima Sohïong.
U la ong ba kane ka jingdawa ka la ïai bteng terter haduh mynta ha kaba ka JAC ka la kynduh bun bunsien bad aiti da ka shithi jingdawa ha ka KHADC bad ka la ïai buddien ïa kane ka kam na ki por sha ki por.
Ka JAC lyngba ka shithi, Dated 17/09/2019 bad kaba No: JAC/Soh/12/2021-22/01 Date: 01/12/2021 bad kiwei kiwei pat ki shithi ka la ka dawa ban wengnoh ïa u Bah Bashemphang Thabah na ka khet Lyngdoh jong ka Hima Sohiong katkum ka Section 6(1)(a), 6(1)(b), 6(1)(c) 6(1)(f), 6(1)(h), 6(1)(i), bad 6(1)(k) jong ka aiñ The United Khasi Jaiñtia Hills Autonomous District (Appointment and Successin of Chiefs and Headmen)Act, 1959.
Ka JAC ka la ïathuh ba ïa kane ka kam, ka Executive Committee ka barim ka la shimkhia hadien ka jingdawa kaba jur na ka liang ki khun ki hajar ka Hima Sohïong ha kaba ki la tur paidbah sha KHADC hapoh ka jingïalam jong ka JAC. Ka KHADC ka la sospon noh ïa u Bah Bashemphang Thabah bad ka thung ïa u Bah A.E. Gatphoh uba dei u ophisar ka KHADC ban tohkit halor ka jingdawa jong ka JAC.
La ïathuh ruh ba ka JAC ka la ïoh jingtip ba ïa ka Inquiry Report ladep ban phah sha ka Executive Committee jong ka KHADC.
“Kumta, ngi dawa ïa u Deputy CEM ba un sngewbha ban pynsted noh ïa kane ka kam bad ban wengnoh mardor ïa u Bah Bashemphang Thabah na ka khet Lyngdoh jong ka Hima Sohïong uba dang don mynta hapoh ka jingshah sospon. Lada ka KHADC ka dang ïai pynslem ban weng noh ïa u Bah Bashemphang Thabah na ka khet Lyngdoh jong ka Hima Sohïong ka JAC bad ryngkat ki khun ki hajar jong ka Hima Sohïong kan hap ban wan tur paidbah biang sa shisien sha KHADC ha kano kano ka por bad ha kum kata ka por ka KHADC ka dei ban shim ïa ka jingkitkhlieh halor ka jingpynslem bad ka jingkuman jong ka,” ong u Bah Shabong ha ka jingïakren bad ki lad pathai khubor hadien ka jingïakynduh ïa u Deputy CEM.
Haba ïathuh ba u Inquiry Officer u ladep ban phah sha ka Executive Committee ïa ka Inquiry Report halor ka jingtohkit pyrshah ïa u Bah Bashemphang Thabah katkum ka jingdawa jong ka JAC, kumta ka JADC ka la kyrpad ïa u Deputy CEM ban ai kopi lang sha ka JAC ïa ka Inquiry Report khnang ba ka JAC kan ïoh jingtip ban peit bniah.
“Hadien ba ladep ban weng noh ïa u Bah Bashemphang Thabah, ngi dawa na ka KHADC ba kan pynkloi noh ïa ka elekshon ban jied ïa u Lyngdoh bapura jong ka Hima Sohïong khnang ba ka synshar khadar hapoh ka Hima Sohïong kan ïaid beit ïaid ryntih noh nangne shakhmat. Ka jing ïaid beit ïaid ryntih ha ka synshar khadar trai Ri trai muluk hapoh ka Hima Sohïong ka dei ka jingthmu bad ka jingangnud jong ka JAC bad ki khun ki hajar jong ka Hima Sohiong hi baroh kawei,” u la ong.
U la ong ba ka JAC bad ki khun ki hajar ki la pynpaw ïa ka jingkyrmen skhem ba ka KHADC kan shah shkor ïa kane ka jingkyrpad bad ka jingdawa jong ka JAC bad ka la kyrpad ruh ïa ka tnat Elaka ban shimkhia ïa kane ka kam kaba long ka kam ïap kam im jong ka Hima Sohïong hi baroh kawei.
