Shillong, Rymphang, 08: Ki nonglum ñiut na thliew iing jong ki briew ha ka shnong Lumshyiap, Shillong ki la kyndit katlah katïai haba ki la lap ïa u khunlung ba dang shu kha ha kawei na ki song plastik ba la bret ha Kali kit ñiut ha ka step sngi Palei.
Kane ka la jia ha dong Shanmari kaba hap hapoh ka shnong Lum shyiap, Shillong.
Tang shu lap ïa kane ka song, u nonglum ñiut u la pyntip marmar sha ki bor pynïaid shnong ha kaba ki la wan poi sha kane ka jaka ban pynlong ïa ka jingtohkit kaba bniah bad ban shimti noh ïa u khunlung dang khah snam ba la shu thep beiñ hapoh ka plastik.
U Rangbah Shnong jong ka shnong Lumshyiap Bah Phira Khongphai u la ong ba ka shnong ka la ai por 12 kynta ïa ki kmie ki kpa kiba donkti ban leh ïa kane kam be-aiñ bad ba kin phla hok hakhmat ka Dorbar Shnong hynrei lada jia ba kim wan mih hapoh kine ki kynta ba la buh, ka shnong kan aiti noh ïa u khunlung sha ki bor jong ka aiñ khnang ba kin leh ïa kaba donkam.
