Shillong, Rymphang, 05: Ka Voice of the People Party ka la bteng ban pynlong ïa ki jingïalang ban pynsngew-thuh ïa ki paidbah da kaba pynlong ha ka jingïalang mynta ka janmiet ha Malki Point.
Ha kane ka jingïalang la ïoh jingkren na u Bah Ardent, Dr. Ricky, Bah Adelbert, Bah Brightstarwel bad kiwei kiwei.
Ki Nongïalam ki la ban biang ba dei ban thungkam biang ïa ki lai ngut ki ophisar jong ka Lokayukta kiba ka sorkar ka la weng kam noh hadien ba ki la tohkit bad lap ïa ki kam bamsap ha ka jingpyntrei ka GHADC ïa ka MDC Hostel bad ka jingweng kam ruh ka long hadien ba kine ki ophisar ki la chargesheet ïa ki briew kiba donkti ha ka jingpyndonkam bakla ïa ka pisa ba 6 Klur tam bad uwei na kiba la shah chargesheet udei u kynum jong u Conrad Sangma, u Sanjay Sangma.
Ki nongkren ki la ong ruh ba ki paidbah kidei ban wad jingtip bad sngewrhuh bha ïa ka Lokayukta namar kane kadei ka atiar ban ïaleh pyrshah ïa ki kam bamsap, la ka long da ki briew sorkar ne wat ki Nongmihkhmat jong ki, haba ki pyntreikam ïa ka Skhim MLA jong ki.
