Tang kawei ka skul jong ka Assam ha Noapara WKHD haduh mynta

Nongstoiñ, K’lyngkot 19: Ka long kaei kaei kaba sngew myllung ban ïoh jingtip ba ka shnong Noapara kaba dang hap hapoh ka West Khasi Hills District, kam don wat tang kawei ruh ka skul kaba lah ban ai ka jingshakri ïa u paidbah haba ïadei bad ka jingnang jingstad ne ka pule puthi.
Ïa kane la lah la ïathuh da u Sankiu R. Marak uwei na ki riew rangbah jong katei ka shnong, ha kaba u la bynrap ruh ba ha katei ka shnong, don tang kawei ka skul jong ka sorkar Assam kaba la tip kum ka Noapara Lower Primary kaba la don naduh ki por ba ka jylla Meghalaya kam pat kha ne don la ka jong bad kaba la seng ruh naduh u snem 1918.
La ong ba kumba 5 ne 6 tylli ei ei ki shnong jong katei ka thaiñ kiba kynthup ïa ka shnong Bangjeng, Dolatha, Dronpara, Noapara bad kiwei kiwei, ki dang hap ban leit skul shaduh ka shnong Aradonga bad ki khynnah ki hap ban ïaid kjat kumba ar kynta ei ei ban poi sha la skul man ka sngi.
Ym tang katta hynrei ha katei ka shnong, kiwei ki kam pynroi kiba kham long kongsan kiba kynthup ïa ka bording, ka jaka sumar nongpang bad kiwei kiwei, kim pat don haduh mynta. Utei u rangbah u la ong lada ka sorkar kan phai khmat lem sha ki, kan myntoi shibun ym tang ïa ka Noapara hynrei ïa kiwei pat ki shnong kiba markhap ruh kumjuh.
Nalor katei ka skul sorkar Assam, ka don kawei pat ka skul shimet bad ki khynnah skul baroh ki don kumba 50 ngut tang na ka shnong Noapara, khlem da kynthup ïa kiwei pat ki shnong markhap. Kumta ka shem jingeh shibun ïa ki khynnah skul ha katei ka thaiñ.
Kumta ka long kaba kongsan na ka bynta ka sorkar Jylla bad khamtam u MLA u ba long nongmihkhmat, ban thaw ki lad ki lynti na ka bynta ban kyntiew ïa ka pule puthi bad ka jingnang jingstad ha katei ka thaiñ baroh kawei.