Shillong, Jymmang 17: Ka Seng A.chik Holistic Awakening Movement (AHAM) ka la sei madan ïa ka jingtih dewïong beaiñ ha kiba bun ki bynta jong ka Garo Hills, wat hadien ba la khang ban tih da ka NGT.
Ki nongïalam jong kane ka Seng, kynthup ïa u President, u George Prince Momin, President bad ka Legal Adviser jong ka Seng, ka Bernita Marak, ki la kynnoh ka jingtih dewïong beaiñ ka jur bha ha ki bynta jong ka Shnong Balal A.dugre, ha Rongchigre bad ha Rongkakgre kiba ha Salsella Constituency.
Ka Bernita ka la ïathuh ba ka Seng na ka por sha ka por ka la ju ujor sha ki bor ba halor halor kane ka jingtih dewïong beaiñ bad la ujor ruh sha ki Pulit.
Mynta ka sngi na la liang ka Seng ka la leit ai da ka jingujor sha u Lat ka jylla, u Satya Pal Malik ban kyntu ha u ba un tuklar ïa kane ka kam beaiñ ba shyrkhei ha Garo Hills.
Hynrei ha kane ka jingïakren bad ki nongthoh khubor ka Bernita, ka la pyntip ba ka Seng ka la ïoh jingtip lyngba ka phone na ka tnad CID ba ki la shimkhia ïa kane ka kam bad ki la sdang ban shim jingpynshitom ïa kito kiba donkti ha ka kam khaïi beaiñ.
Ha kajuh ka por ki nongïalam ka AHAM, ki la ïathuh ba ka jingtih beaiñ ïa ki marpoh khyndew wat hapdeng ka jingkhang ka ïingbishar, hynrei ka don ruh ka jingtih beaiñ ïa u maw u shyiap ha kiba bun ki bynta jong ka Garo Hills.
Shuh shuh ka Seng ha ka jingthoh ba ka la ai sha u Lat, ka la ong ba katkum ka hukum ba la pynmih da ka sorkar Meghalaya ha ka 1 tarik u Nohprah 2021 lyngba u Under Secretary to the Government of Meghalaya Mining and Geology Department ka la shah ïa ka M/S Jaimaa Coal Private Limited na Beltola, Guwahati ban shalan ïa u dewïong na shabar jylla lyngka ka Gasuapara Land Custom Station sha Bangladesh. Hynrei ka AHAM ka la ujor sha u Lat ba kane ka kompeni kam shym la shalan ïa u dewïong uba mih na Assam, hynrei ki la shalan ïa u dewïong uba la toh beaiñ na Meghalaya bad la tih ruh da ka rkom jukhyndai ym katkum ka rukom tih da ka juk saïan ba mynta.
