U Monkiru Chyrmang um dei u nongshong shnong ka Pamrapaithlu: Dorbar Shnong Pamrapaithlu
![](https://mawphor.com/wp-content/uploads/2024/01/SHAHPYNIAP-EAST-JAINTIA-2.jpg)
Khliehriat, K’lyngkot, 04: Ka Dorbar Shnong Pamrapaithlu ha ka sngi Palei ka la kyntait mardor halor ka jingkam jong u u Monkiru Shyrmang, u runar uba donkti ban pynïap dusmon ïa kawei ka longkmie, ba u dei u nongshong shnong jong jong ka shnong Pamrapaithlu.
“Ym lah hi ruh ban pdiang ba u (Monkiru Chyrmang) dei u nongshong shnong namarba kam long ka rukom bad kam ju don hi ruh ka jingsynshar ka khadar shnong hapoh ka Dorbar Shnong Pamrapaithlu ban pdiang shnong ïa u/ka briew khlem da don hapoh ka thup nombar ïing katkum ba la buh beit buh ryntih ïa ki longïing longsem baroh salonsar hapoh ka thup kyrteng ne ka bui jong ka shnong,” la ong u Waheh Shnong jong ka shnong Pamrapaithlu u Bah Leningstar Rymbai bad u Secretary Shnong u Bah Lakshmon Siangshai lyngba u kyrwoh ba la phah sha ki lad pathai khubor.
Kine ki nongïalam shnong haba pynpaw ïa ka jingpyrshah bad ka jingsngewkhia ki la ong, “halor ka jingmih kyrteng ka shnong jong ngi, ngi pynpaw ïa ka jingpyrshah kaba jur ba kumno ki bor jong ka aiñ ki la pdiang ïa kane haba khlem da ïoh ïa ki sakhi satar kiba biang ban pynshisha ba u Monkiru Chyrmang u dei na ka shnong jong ngi, ka Pamrapaithlu bad kaba sngewthamula bad kaba pynsngewsih ïa ngi ka long ba wat na ka bor jong ka aiñ ruh ki khlem kynjoh ktien sha u Waheh Shnong wat tang shi kyntien ruh ban pynshisha ïa ka jaka sah bad ka long ka jingpynjah burom ïa ka shnong jongngi, ka Pamrapaithlu.”
Hadien ba la mih ka khubor ha kaba ïadei bad ka jingshah pynïap ka Kong Lita Ryngkhlem na ka shnong Wapung Shnong bad u nongpynïap uba dei na ka shnong Pamrapaithlu uba kyrteng u Monkiru Shyrmang uba la 29 snem ka rta, mar mar ka Dorbar shnong ka la pynlong ïa ka Executive Body Meeting ha ka sngi Balang ban ïatai sani bha halor kane ka jingjia pyrshah ïa u Monkiru Chyrmang uba la kam ïalade ba u dei na ka shnong Pamrapaithlu.
Ka Dorbar Shnong ka kwah ban pynshai paidbah sha baroh ba u Monkiru Chyrmang um dei satia na ka shnong Pamrapaithlu bad ka Dorbar shnong ruh kam ithuh ïa u kum u trai shnong, namarba une u briew um don kawei ruh ka jingpynshisha ba u long u trai shnong jong ka shnong Pamrapaithlu.
Shuh shuh ka Dorbar Shnong ka la pynshai ba u Monkiru Chyrmang um don hi ruh wat tang ka Election Photo Identity Card (EPIC) hapoh ka Electoral Roll bad um don hapoh ka jinglumthup (Registration Record) hapoh ka rijister jong ka Dorbar Shnong kumba don ki longïing longsem bad ki nongshong shnong baroh. Halor kine ki nongrim ka Dorbar Shnong kam lah ban pdiang ïa ka jingkam jong u Monkiru Chyrmang ba u dei na ka shnong Pamrapaithlu.
Ha kajuh ka por, ka Dorbar Shnong Pamrapaithlu, ka la maham tyngeh ïa ki briew kiba shim kabu ban pynjah burom ïa ka shnong ka thaw lada dei na ki ophis Sorkar ne ki lad pathai khubor ne ki sengbhalang ne ki riewshimet ba nangne shakhmat kan nym dei shuh ban dang jia kumne bad lada ka dang jia ka Dorbar Shnong kan sa shim ki lad ki lynti pyrshah ïa ki katkum ka bor jong ka aiñ.
Ka Dorbar Shnong ka phah ruh ïa ka jingsngewlem sha ki bahaïing hasem jong ka Kong Lita Ryngkhlem ba u Blei un kyrkhu kyrdoh ïa ki khun ki kti ki jong ka khnang ba kin ïoh ka met ka phad kabakoit bakhiah bad Un kyrkhu ruh ïa ki ha baroh ki liang.