Shillong, K’lyngkot, 04: Ka shnong Kongthong ha ka sngi Palei ka la rakhe ïa ka Hamara Sankalp Viksit Bharat ha kaba u Deputy Secretary jong ka Ministry of Women and Child Development ka Sorkar India u Bhaskar u la long u Kongsan ryngkat ka jingdonlang jong ka Additional Deputy Commissioner ka East Khasi Hills District ka Kong DD Syngai bad u BDO jong ka Khatarshnong-Laitkroh C&RD Block u Bah PS Tyngsong.
La pdiang sngewbha ïa kine ki kynrem ki lyndan da ki paidbah nongshong shnong jong ka shnong Kongthong hapoh ka jingïalam jong u Sordar Bah Teibor Lynrah lem bad u Bah Rothel Khongsit nakhmat ka AMRIT Mahotsav Gate terter ryngkat ka kynhoi ka phawar bad ka jingtem ïa ka ksing bad ka jingput ïa tangmuri.
Ki ophisar kiba la sakhi lang ha kane ka sngi, ki la ai ruh ïa ka jingpynshai shaphang ki shkim bapher bapher kynthup ïa ka tnat Pule Puthi, ka rep ka riang, ka ri jingri, ka koit ka khiah, ka umbam umdih, ka Social Welfare, ka NRLM, ka tnat Labour bad kiwei.
Da ki spah ngut ki nongshong shnong ki la ïashim bynta lang ban sngap ïa ki jingpynshai na ki ophisar jong kine ki tnat treikam ka Sorkar.
Shwa ban pynkut ïa ka jingïalang la pynlong pat sa ïa ka jingpyni kolshor da ki nongshong shnong ryngkat ka drama na ki dkhot jong ka Village Organization jong ki SHG.
Kum ban shu pynkynmaw hangne, ïa ka shnong Kongthong la shimti da u MP ka Rajya Sabha u Prof. Rakesh Sinha hapoh ka Sansad Adarsh Gram Yojna (SAGY-II).
