Shillong, Nohprah 21 : U MDC ka Lïang Pyrshah na Shella Bah Teinwell Dkhar ha ka sngi Palei u la wanrah ha ka Dorbar Tlang ïa ka mat kaba ïadei bad ka jingpynslem jong ka Council ban siew tulop ïa ki nongtrei da kaba kynnoh ba teng teng ka jingpyllait tulop ka poi haduh palat ïa ka 10 tarik man u bnai.
Hynrei na ka liang u CEM, Bah Pynïaid Sing Syiem haba jubab halor kane ka jingkynnoh u la ong, “Ïa ka tulop ngi la pyrshang ban ai ha ka por kaba biang bad ngi pyrshang katba lah ban pyllait tulop shwa ka 10tarik.”
Tangba, u CEM u kubur ba don arbnai ba ka jingpyllait ïa ka tulop ka dei palat 10 tarik hynrei kiwei pat ki bnai ki dei beit hapoh katei ka tarik.
“Ka daw ha kitei ki bnai ka long ba ka pla tyngka ban siew tulop ka duna namar tang ka jinglut ban siew ïa ki nongtrei, naduh ki ophisar, ïa kiba ïoh penshon bad kiwei kiwei ki jingsiew ka la poi ym duna ïa ka 5 klur shibnai.
U Bah Pynïaid u ong ruh ba ïa ka tulop kim lah satia ban shim na ki skim kam pynroi hynrei kadei ban pynlang na ki khajna bad kiwei kiwei ki bhah ba ïoh lum bad kiba ïoh na ka sorkar jylla.
“Khyndiat bnai don ka jingthut namar ka jingslem ka bhah ban poi shangi hynrei dei da jingtrei shitom ka Executive Committee ba la lah ban ai ïa ka tulop. Na ka liang jongngi, ngin pyrshang katba lah ban ym ktah ïa ki ophisar bad ki nongtrei namar ki la trei shitom bad trei palat ban ïa ka por trei” u la bynrap biang.
