Ka Histori ka pyni ba bun ki nonghikai ki la jop elekshon bad noh synniang shibun eh

Shillong, Nohprah, 21: Ki nonghikai hapoh ka jingïalam ong u MLA ka VPP na Mawlai Constituecy u Bah Brightstarwell Marbaniang ha ka sngi Palei ki la ïathuh ba ka jingïakhun mukotduma ha Supreme Court ka dang ïaid mynta hapdeng ki nonghikai bad ka Sorkar ha kaba ïadei bad ka jingpynmih ïa ka jingpynbna kaba khang ïa ki nonghikai ban ïashim bynta ha ka jylli jong ka saiñpyrthei.
Ha ka jingïakren bad ki lad pathai khubor u Bah Marbaniang u la pyntip ba ha u snem 2022, ki nonghikai ki la ujor sha ka Ingbishar Meghalaya High Court pyrshah ïa ka Sorkar hadien ba ka la pynmih ïa ka jingpynbna ba la khang ïa ki nonghikai ban ïashim bynta ha ka saiñpyrthei.
U Bah Marbaniang u la ong hadien ba ka Sorkar ka la pynmih ïa kane ka jingpynbna, ki nonghikai ki la pyrshang ban ïakynduh markhmat ïa ka Sorkar ban pynshai bad ban batai bad kumjuh ruh ban dawa ïa ka Sorkar ba kan weng noh ïa kane ka jingpynbna hynrei ka Sorkar kam shym la sngap satia ïa kane ka jingkyrpad.
“Ngi la ïohi ïa ki jingkren jong u Myntri Rangbah uba ong lada ki nonghikai ki pyrshah ïa ka jingbthah jong ka Sorkar ki lah ban mudui sha ka Ingbishar bad kane ka la pynlong ïa ngi ban ujor sha ka Ingbishar Meghalaya Court ha kaba ka Ingbishar ka la pynksan ïa ngi,” la ïathuh u Bah Marbaniang.
U Bah Marbaniang u la ong, hadien ba ka Single Bench ka la pynksan ïa ki nonghikai, ka Sorkar Jylla ka la ujor sha ka Division Bench ha u snem 2023 bad sa shisien ka Ingbishar ka la pynksan biang ïa ki nonghikai.
“Ha u snem 2023, ka Sorkar Jylla ka la leit ban tied ïa ka jingkhang jong ka Ingbishar Supreme Court bad ka jingshong bishar banyngkong eh ka la long ha ka 11 tarik mynta u bnai bad ka mukotduma ka dang ïaid shakhmat ha Supreme Court” u la bynrap.
U la ong ba ka mukotduma kam dei satia hapdeng u riew shimet pyrshah ïa ka Sorkar hynrei ka dei ka mukotduma hapdeng ki nonghikai jong ka Jylla Meghalaya pyrshah ka jingpynbna jong ka Sorkar.
“Kum ki nonghikai, ngi ruh ngi don ka hok ban thep vote, ka hok ban ïakhun ïa ka elekshon bad ban kitkam ha ki seng saiñpyrthei bad lada ki leit katkum ka histori jong ka Jylla Meghalaya ki don bun ki nonghikai kiba la ïakhun ïa ki elekshon bad ki la jop bad ki la noh synñiang shikatdei eh sha ka roi ka par jong ka jylla,” la ong u Bah Marbaniang.
Shuh shuh u la ong ba kane ka jingïakhun pyrshah ïa ka Sorkar Jylla kan pynthikna ba ki pateng ki ban sa wan kin ïoh ïa ka lad ban ïakhun ïa ki elekshon.
U la bynrap ba ka kyndon jong ka UGC ka ong, “kum shi bynta ka kam ba ngi trei, ka dei ka kamram jong ngi ban hikai bad ban tynrong ïa ka jingkitkhlieh,”
“Tang hadien ka jingpynmih ïa ka Service Book da ka Sorkar Meghalaya, ka jylla ka la shim kylliang na ka Jylla Assam ka bym khang satia ïa ki nonghikai hynrei dei tang hapoh khyndiat snem ba ka Sorkar Jylla ka la wanrah ïa ka aiñ kaba khang ïa ki nonghikai ban ïashim bynta ha ka saiñpyrthei,” u la bynrap.