Shillong, Nohprah 19 : Ka Iing Bishar High Court jongka jylla ha ka sngi Ba-ar, ka la hukum ïa ka Sorkar Jylla ba kan pynkynriah kam noh mardor ïa u Superintendent of Police (SP) ba mynta ka East Jaintia Hills namar ka jingbym lah ban pynsangeh ïa ka jingtih tuh bad jingshalan beaiñ ïa u dewiong ha katei ka District.
“Halor ka jingbym lah jong u SP kumba la paw ha ka 19th Interim report, kumta la hukum ba dei ban pynkynriah kam noh mardor ïa u na ka kam ba u bat mynta bad thung mardor da uwei u Ophisar ba lah ban treikam hapoh ka District “ ong ka ïing Bishar ba kynthup ïa u Chief Justice (Acting) HS Thangkhiew bad Justice W Diengdoh ha ka hukum bala pynmih halor ka PIL ba la mudui ïa kane ka kam.
Ka hukum ka ong ba u Superintendent of Police kumba la pyntip, ula shah thungkam ha EJH naduh u snem 2021 bad u namar kata, u dei ïa ka ban tip bha ïa kaei kaba jia hapoh ka District.
Ka Interim report ba 19 bala aiti da u Single Member Committee, ka pyni ba u Superintendent of Police lehse um shym la leh eiei ha ka ban ratdyngkhong ïa ki kam beaiñ.
Ka ïing Bishar kala hukum ruh ïa ka Tnad kam Pohïing bad ïa u Director General of Police ba kin leh ei ei mardor halor kane ka hukum.
Ha kajuh ka por, ka ïing Bishar kala byrngem ban ai da ka notice contempt pyrshah ïa ki bor District halor ka jingkdew jong ka interim report ïa ka jinglap biang ïa ka jaka pyllang dewiong ba thymmai harud surok National Highway ha Byndihati nalor u dewiong ba la pyllang ha lyndet ha Don Bosco College.
Ka ïing Bishar ha ka hukum ka la ong, haba ailad ïa ka Jylla ban jubab ïa ka 19th interim report bad ban nym pat pynngat ha ka contempt, u Deputy Commissioner bad u Superintendent of police kiba don ha ka thain, la khmih lynti ba kin pynthikna ba ka aiñ kan treikam bad ban burom ruh ïa ka hukum ka ïing Bishar
Ka ïing Bishar kala hukum ruh ban siew ïa ka jingsiew ba T. 3 lak sha u Justcie Katakey nalor ki allowance bad jinglut jingsep jong u.
