Hadien ba pynkhyllem ïa ki Atoskhana pynbna ka sorkar ban sa khang dam noh ïa ka MCCL

Shillong, Nohprah 19 : Hadien ba la dep pynkhyllem ïa ki Atoskhana jongka MCCL,ka Sorkar Jylla ka la pynbna ba shen kan sa rai kut ban khangdam noh ïa ka Mawmluh Cherra Cement Limited (MCCL) namar ka jingbym lah shuh ban khyllie pat ïa ka kompani wat hadien ka jingbei pisa lynter ba palat 300 klur tyngka ha kine ki 15 snem ba la leit noh.
Haba pyntip ïa kane mynta ka sngi Ba-ar, u Myntri Rangbah ka Jylla Conrad K Sangma ula ong “Ngin shim ïa ka lynti ban khangdam noh ïa ka MCCL namar ngim shym lah shuh ban pyntyllun ïa ka namar hap ban bei pisa bun shah nalor ba ngi la dep pynlut lypa kumba T.300 klur ha kine ki 15 snem ba la leit”.
“Ngi la pyrshang katba lah ban pynkhie im ïa ka karkhana hynrei namar kiba bun ki daw kiba mih, ki paidbah ki la mad ïa ki jingeh, ki nongtrei ki la mad jingeh, ka Sorkar kam shym lah shuh ban pynïaid shakhmat, kumta ka long kaba donkam ban shim rai ban ïaid tang ha kawei ka lynti. Ngim lah ban shu ïeh ba kan shu snoh ha suiñ bad kumta, ngi la rai lang bad ha ryngkat ki kynhun bapher bapher, ba ngin khang khyrdep noh ïa ka hynrei ngin leh ïa kane hadien ka jingïasyllok bad ki kynhun bapher bapher haba ïadei bad ki kyndon jingïateh kular” ula bynrap.
U Conrad ula ong ba ha ka jingshisha ka Sorkar ka la shim ia ka bynta ban ïapynbeit da ka jingïasngewthuh jingmut bad ki kynhun bapher bapher lem bad ki nongtrei bad “Ngi lah jan poi sha kaba kut bad ka rai ha ryngkat bad ki kynhun bad ki nongtrei ha kaba ngin pyntreikam noh da ka VRS bad ka jingïa khublei kti ba khatduh mar kylliang bad ki Nongtrei ba pura jong ka MCCL”.
U Myntri Rangbah ula ong pat ba ka Sorkar kam pat rai kut ïa kane ka rai bad ka dang pynkhreh mynta ïa ki kyndon ha ka ban khangdam noh ïa kane ka kompani.
Haba kylli ïa kaei kaba jia ïa ka rai jong ka Kynhun Myntri kaba 19 tarik Naitung 2021 ban pynim ïa ka MCCL da ka Joint Venture bad ki kompani shimet, u Myntri Rangbah ula ong “Ngi kwah ban leh ïa ka Joint Venture hynrei sngewsih ba ngim shym la ïoh ïa ki jubab kiba sngewtynnad. Kumba nga ong, haba nyngkong ba ngi don lai tylli ki lad, kaba nyngkong ba ka Sorkar kan pynlut haduh T.150 klur ne jan kot T.200 klur ïa kaba ngi shem ba ka long kaba eh bha ïa ngi ban leh”.
“Ka lynti kaba ar ka dei ba ngin leh da ka joint venture bad ki la pyllait ruh ïa ka jingpynbna Expression of Interest. Ki la don katto katne ki kompani kiba wan hynrei kine ki kompani kim pat kot ïa ka kyrdan kaba ngi sngew ba kin lah ban leh hok ïa ka kam” ula ong haba pynpaw ba ka lynti ba khatduh eh ka dei ka rai lang bad ki kynhun bapher bapher ba ngin khang khyrdep noh ïa ka kompani lada kut kine ki artylli ki lad.
“ Dei na kata ka daw ba ngi la rai ban ïaid shakhmat bad ka rai ban khang noh ïa kane ka kompani pynmih dew bilat ka sorkar tangba ngin ïa pynbeit lang ïa ki kyndon shwa ban khang” pynkut u myntri rangbah.