Shillong, Nohprah 18 : U Nongïalam ka Congress uba dei ruh u MP na ka Shillong Parliamentary Constituency mynta ka Lah Sngi u Blei u la ong ba ka sorkar ka dei ban pynthikna ba ka seng Hynniewtrep National Liberation Council (HNLC) ka dei ban pynsangeh noh mar mar ïa ka jingpynrung dkhot jongka.
U la ong ka sorkar pdeng, ka sorkar jylla bad ka seng HNLC ki dei ban shim khia bha halor kane ka soskular kren ïasuk khnang ban poi sha ka thong. U la ai jingmut ba ka sorkar ka la dei ban pyndonkam ruh da u Chairman ba rim ka seng HNLC u bah Julius Dorphang uba dei ruh u MLA ba rim ka Mawhati ban don bynta ha kane ka jingkren ïasuk.
ïa u bah Dorphang la kem bad set phatok halor ka jingkynnoh ba u leh beijot ïa kawei ka khynnah.
“ Ka sorkar ka dei ban shim khia bha ïa ka jingkren ïasuk bad ka dei ban don ruh ka jingbud dien ba khlaiñ ba ka seng HNLC ka dei ban pynsangeh noh ïa ka jingpynrung dkhot bad kito ki dkhot kiba don shabar ri ruh ki dei ban wanphai noh sha ka jylla.Kam dei ban long ba phi kren ïa u General Secretary bad phi khlem kren bad u Chairman jongka seng” ong u ma Pala.
U la ong “ U Chairman ba rim ka seng HNLC uba dei u MLA ba rim ka Mawhati uba don ha phatok mynta ha ka jingshisha ka sorkar ka la dei ban pyndonkam ïa u ha kane ka jingkren ïasuk”
U ma Pala u pynpaw ka jingbynniaw halor ka jingbym shim khia jongka sorkar ban pynïaid shakhmat ïa ka jingïakren ban poi sha ka jingïasuk. “ Ha nga shimet nga sngew ba ka sorkar ka shu pyrshang hynrei kam shym la shim khia ïa ka kam” ong u ma Pala.
Haba ai nuksa ïa kiwei ki jylla kum ka Nagaland bad Assam bad kiwei kiwei ki jylla kane ka thaiñ u ma Pala u la ong ba ka sorkar pdeng ka khlem shim khia satia da lei lei ruh ban wanrah ïa ka jingsuk ha kane ka thaiñ. U la ong ka sorkar pdeng ka dei ban wad ïa ki daw tynrai kiei kiba pynlong ban mih kine ki kynhun kieng atiar namar wat hadien ba la ïasoi soskular bad kiba bun ki kynhun kiba rim hynrei dang ïai mih beit kiba thymmai.
Halor ka jingdawa jongka seng HNLC ban map lut ïa baroh ki jingshah pynngat kyndon, u ma Pala u la ong “Ha kaba kut hi ka aiñ ha India ka shai kdar. Mynta u nongïalam ka ULFA u la dei u MP la arsien arwat mynta, u nongïalam ka HNLC u la dei u Myntri sorkar, u Chairmanjongka u la dei u MLA ba rim kumta nga sngew na ka liang ka sorkar lada ka ïohi ba ka seng HNLC ka lah ban tehlakam ïa ki dkhot jongka kam don jingeh ban leh ïa kane. Kaba kongsan eh ka long ba donkam ban ïashim khia na baroh ki liang wat na ka liang ka sorkar pdeng ruh namar ki lah ban leit wat shabar ri ruh kumba ki la dep ïasoi bun ki soskular bad ka sorkar Bangladesh ruh”.
