Shillong, Nohprah 06 : U Symbud Myntri Rangbah ka jylla, Bah Prestone Tynsong ha ka sngi Balang u la kyntu ai ki kompeni ba ki dei ban pyntip sha ki bor distrik lada jia ba don kino kino kiba wan pyndik ne pynthut ïa ka jingpyntrei ïa kino kino ki projek kam pynroi ha ka jylla.
Katei ka jingkren jong u Bah Prestone kadei halor ka hukum ba pynmih da ka Meghalaya High Court kaba bthah ba donkam ban tuklar ïa ka jingpynthut bym itynnad da ki kynhun bad ruh ban pyntikna ba kan don ka jingpyndep kaba janai ïa ka surok Shillong Dawki bad ruh ïa kiwei pat ki projek kiba kynduh ïa kijuh ki jingeh.
“Nga la dep kren shai ba kino kino kino ki jingpynthut ne ka jingshah pyndik kaba phi kynduh sngewbha pyntip sha ki bor distrik, ngin pyntikna ba kum kita ki jingjïa ba kim dei ban jïa ha ka jingpyntrei ïa ki projek kiba dei na bynta ka bha ka miat jong ki paidbah ka jylla,” u la ong.
Ha kajuh ka por u la ïathuh ba la bthah ruh ïa ki bor distrik ba kin peitngor ba kan don ka jingshngaiñ ïa ki nongbylla kiba pyntrei ïa kitei ki projek kiba kongsan.
Haba kren pat halor ka Meghalaya Identification, Registration (Safety & Security) of Migrant Workers Act, 2020, u Symbud Myntri Rangbah u la ong ba la bthah ïa ki kompeni ba pyntrei kumjuh ïa ki kontaktor ba ki dei ban pyntikna ba ïa ki nongbylla ba kin don ïa ki labour license na ka tnad Labour jong ka sorkar.
