25 tylli ki snem hapdeng ki jingeh, ïaid lynti ka Nongrim Byrni Presbyterian Sec. School ban pynphriang jingnang jingstad

Nongpoh, Nohprah 06: Hapdeng ki jingeh bad ki jingtynjuh kiba bun ban pynphriang ïaka jingnang ka jingstad sha ki khynnah haka thaiñ Byrnihat, ka Nongrim Byrni Presbyterian Secondary School mynta ka sngi hapdeng ka jingkmen kala jam ïa u mawmer ban rakhe ïaka jingïaid lynti ba 25 snem naduh bala seng ïaka ha u snem 1998 ban long kum kawei naki shlem hikai.
Ïa katei ka jingrakhe dap 25 snem ne ka Jubili Rupa la wan ban plie pyrda mynta ka sngi da u Bah Sosthenes Sohtun MLA ka Jirang kum u kongsan haka jingdonlang u Bah Vincent Nianglang Jt Director of School Education Ri-Bhoi District kum u symbud kongsan, Bah Victor Rani MDC ka Jirang, Tbn M Syiem President MC, Kong Batrity Pyngrop Headmistress, Rev PG Khongsdir, Bah Johny Syiem Rangbah Shnong Lum Nongrim, ki pastor, ki rangbah balang jong ka Balang Presbyterian bad kiwei kiwei ki riew rangbah.
Ha katei ka sngi ka jingsdang jong ka jingrakhe dap 25 snem jong ka skul, naka liang ki bor pynïaid kila ioh ruh ban pynlait ïaka Souvenir jong ka skul ban pynkynmaw ïaki jingïaid lynti ba 25 snem bala pynlait paidbah ïaka da u Bah Vincent Nianglang bad ki kongsan ha katei ka sngi.
Haba phai khyndiat halor ka jingïaid lynti bad ka history jong katei ka skul, la seng ïaka ha u snem 1998 da ka Nongjri Umsning District lyngba ka Education Committee ryngkat ka jingprat lynti ba nyngkong eh da I (L) Rev. SR Nongrum ha kaba la sdang ïaka skul haka Lower Primary Section haka jaka bala ai sngewbha da ka shnong Lumgnongrim Byrnihat, hynrei katba dang ïaid ki sngi bad ki snem katei ka skul kala nang san nangroi haka jingdon ki khynnah na uwei u snem sha uwei pat ban ioh ruh ban kyntiew kyrdan ïaka skul haduh ka klas X, bad ban long ruh kum kawei naki shlem pule kaba la pynmih ruh shibun ki samla bad ki khraw pyrkhat wat hapdeng shibun ki jingeh bad ki jingtynjuh ba ki bor pynïaid skul bad ki nonghikai ki mad tad haduh mynta ka sngi ba kum ka skul kala ioh syndon ban rakhe ïa u marmer ba 25 snem ka jingïaid lynti.
Naka liang ki bor pynïaid skul ha katei ka sngi kila ioh ruh ban pynkup burom ïaki riew rangbah, ki nonghikai ba nyngkong, ki khynnah skul ba pass nyngkong na katei ka skul ka jingsngewnguh halor u synñiang u bynhei ba kila noh bad don bynta bad katei ka skul.
Haba kren ha katei ka sngi naka liang u Bah Sosthenes Sohtun kum u kongsan u la ai ka jingïaroh ïaki bor pynïaid skul, ki nonghikai naduh ka por bala sdang ïaka tad haduh mynta kiba la len lade ban pynheh pynsan ïa katei ka skul kumba ka long mynta ban pynphriang ïaka jingnang jingstad sha ki khynnah ha katei ka thaiñ.
U la ong ruh ba kam long kaba suk ban pyntyllun ïaka shlem pule haduh 25 tylli ki snem lada ki bor pynïaid skul, ki nonghikai kim trei shitom bad len lade, hynrei dei namar ka mynsiem kaba rhem haki ban pynphriang ïaka jingnag jingstad katei ka skul ka roi bad ka san kumba ka long mynta, ryngkat ka jingkyrmen bad kkyrkhu kyrdoh ba katei ka skul kan dang kiew shaphrang ha baroh ki liang bad dang lah ruh ban pynmih shibun ki riewkhmat bad ki samla kiba don ka thong haka jingim, u la bynrap.
Shuh shuh naka liang ki khynnah pule jong katei ka skul hapdeng ka jingiphuh iphieng kila ioh shimbynta ruh haki rwai ka shad ban lehkmen ïa ka jingdap 25 snem jong ka skul.