Da ka Kong Macdalyne S Mawlong tyrwa biang ki nongkyrshan NPP ban ïakhun MDC na Umsning Constituency
Nongpoh, Nohprah 06: Ki nongkyrshan jong ka National Peoples Party, Umsning Block sa shisien pat kila pynsawa bad tyrwa biang ïaka kong Macdalyne S Mawlong kaba dei ka MDC ba mynta ban long biang kum ka kyrtong ban aireng haka elekshon MDC ban sa wan na Umsning Constituency
Ki nongkyrshan ba radbah jong ka party NPP ha Umsning kila pynsngew ruh ïa katei ka sur haka jingïakynduh lang jong ki nongïalam ba hakhmat jong ka party National Peoples Party Umsning Block kaba la long haka 5 tarik Nohprah ha Umsning Auditorium ba la wan ban ïadon lang da u bah Jayson S Mawlong Ex MLA jong ka Umsning u ba dei ruh kum u State Secretary, Shillong City, Bah Wankerlang Nongrum President NPYF Kong Aidalin Syiemlieh President Women’s Wing, Biren Syngkli President NPP Umsning Block lem bad kiwei kiwei ki nongkitkam ba hakhmat jong ka party NPP.
Naka liang ki nongïalam ba hakhmat jong ka party haba kren ha katei ka sngi kila pynpaw ba kum ki nongtrei bad ki nongkyrshan ba shitrhem haka party NPP ki dang ibit biang ïaka kong Macdalyne S Mawlong ba kan aireng biang ïaka elekshon MDC na Umsning bad ban long kum ka kyrtong jong ka party NPP. Kila pynpaw ruh ba katei ka dei ka sur kaba shai bad sawa naki nongtrei ba shitrhem jong ka party namar ki iohi ïaka jinglong shisur shidur jong ka kong Macdalyne S Mawlong bad kaba dang ibit ban shim biang ïaka bynta kum ka MDC na Umsning Constituency.
Kum ban shu kdew hangne ka Kong Macdalyne S Mawlong ka dei ruh ka kyrtong NPP kaba la ïakhun ïaka elekshon MLA ba dang shu dep na Nongpoh constituency, hynrei kam shym la poi sha ka thong hadien ba ki paidbah ki dang ibit biang ïa u Bah Mayral Born Syiem ban long kum u nongmihkhmat na Nongpoh Constituency.
Hadien katei ka jingïalang jong ki nongkitkam ka NPP Umsning Block kaba la long ha Umsning naka liang ki nongïalam ba hakhmat kila leit buh ruh da ka shithi sha u President ka NPP Ri-Bhoi Bah Clement Mawlong ban un rah ïa katei ka khubor bad ka rai jong ki nongkyrshan ka party na Umsning bad ban pynsngew sha ki bor bahalor jong ka party ban leh ïa kaba donkam.