Khliehriat iaiong 15: Ka tnat CSR jong ka company dewbilat Star Cement Lumshnong myn ha ka 13 tarik mynta u bnai ka la sam ei ïa ki tiar sha kito kiba la dep pyndep ïa ki jingshah jinghikai, ha kaba la sam ïa ki kor suh jaiñ bad ki beautician kit ha kaba kin dup lah ban sdang la ka jong ka kam kum ka lad kamai ban ieng hala ki jong ki kjat.
Ka heh sorkar kaba na ka tnat Basin Development, ka kong Prabha Lyngdoh, haba kren kum ka konmgsan ha katei ka jingialang ba la pynlong ha community hall Lumshnong, ka la ai mynsiem shuh shuh ïa kito kiba la dep ïa kane ka jingshah hikai ba kin nang trei shitom shuh shuh ban kyntiew ïa ka ioh ka kot bad ba kyntu ruh ba ym dei ban shu ap khmih lynti tang ïa ka kam sorkar hynrei ban trei ruh ia ki kam lajong, ha kajuh ka por ka la ong ruh ba kum kine ki jait ai jinghikai ki dei ki synjam kiba lah ban lam sha ka lawei kaba phyrnai.
Ka kong Lyngdoh, ka la ai ruh ka jingiaroh ïa ka tnat CSR jong ka Star Cement kaba ju trei shitom ban kyntiew ïa ki ‘riew don sap bad prat lynti ïa ki sha ka lawei ba phyrnai, kaba ju pynlong ïa kiba bun ki jingai jinghikai kiba ym donkam ban siew pisa bad pynpaw ruh ka jingsngew nguh ïa ki kam ba radbah jong ka tnat CSR jong ka company ban kyntiew ïa ka ioh ka kot ha ka imlang ka sahlang.
Ki don haduh 23 ngut ki khynnah samla kynthei kiba la ioh ïa ki tiar beautician kit ryngkat bad ki syrnot bad ki don 16 ngut ki kynthei kiba la pass ïa ka jingshah hikai suh jaiñ kiba na ka batch 7th kiba la ioh ïa ki kor suh jaiñ ryngkat bad ki syrnot.
Kiba la ïa don ryngkat lang ha kane ka prokram, ki kynthup u Assistant Waheh shnong Lumshnong, u bah Embhahlang Lamare, u local director jong ka company Star Cement, u bah Emlangki Lamare, u dkhot ka dor bar shnong Lumshnong, u bah Korma Mukhim, u bah Grim land Dkhar bad kiwei kiwei.
La ioh ia ka jingkren ha ki dkhot ka dorbar shnong Lumshnong bad kumjuh ruh na u Assistant Manager ka tant CSR Star Cement, u Kingshok Borah.
