Yn long CM u Nongpahara barim ka Indira Gandhi ha Mizoram, jop u player Phutbol ka India

Aizawl, Nohprah 04: Ka Kynhun ïatreilang jong ki hynriew tylli ki Seng trai ri ha Mizoram, ka Zoram Peoples Movement (ZPM) ka la jop ïa ka elekshon sha ka ïingdorbar Thawaiñ jong ka Mizoram da kaba jop 27 Seat ha ka ïingdorbar kaba don 40 ngut ki dkhot.
Ka Mizo National Front (MNF) kaba la ïalam da u Zoramthanga, kaba la bat ïa ka bor synshar ha kine ki bun tylli ki snem, ka la shah rem kput da kaba jop tang 9 Seat. U Zoramthanga ïalade ruh u la shah rem.
Da kane ka jingjop ka ZPM, u Lalduhoma uba la 74 snem ka rta bad uba long u nongïalam kane ka Kynhun, u lah ban long u Myntri Rangbah ba thymmai kane ka jylla kaba don khappud lang bad ka Myanmar bad Bangladesh.
U Lalduhoma, u IPS Officer barim ka India, u la ju long teng ruh u Security Officer jong ka Myntri Rangbah Duh ba la khlad noh jong ka India, ka Indira Gandhi. Hynrei u la iehnoh ïa ka kam IPS ban ïakhun ïa ka elekshon Lok Sabha ha ka snem 1984 bad u la jop na ka Seng Congress. Hynrei hadien u la phet noh na ka Congress bad udei u MP ba nyngkong eh ban shah pynduh ka jinglong dkhot katkum ka aiñ kyntiap Seng. Hadien kane u la ïaleh kum u MLA na ki artylli ki Constituency, hynrei u la pyllait noh ïa kawei ka Constituency bad bat tang ïa ka Serchip Constituency, kaba u la jop biang mynta. Hynrei ha u snem 2020, u la shah pynduh ka jinglong MLS na ka daw ka jingpynkheiñ ïa ka aiñ kyntiap Seng.
Ki khubor ba la ïoh na Mizoram, ki ong ba u Lalduhoma, udei ruh u Tymmen Basan jong ka Balang Presbyterian Chawlhhmun.
Nalor u Lalduhoma, kiwei pat kiba kham paw kiba la jop na ka Party ZPM, ki long ka Baryl Vanneihsanngi, kaba dang 32 snem ka rta kaba ju long ka TV Presenter bad ka dkhot jong ka Mizoram Municipal Council. Kadei ka ruh ka Social Media Influencer kaba don la ka jong ka account ha Facebook, Instagram bad ju mih borabor ha ki rynsan Social Media.
Napdeng kiba la jop MLA na ka Seng ZPM, kaba la pynlyngngoh ïa kiba bun kadei ka jingjop jong u Jeje Lalpekhlua, uba long u player phutbol jong ka ri India bad uba la ju ïalehkai na ka Club Chennayin FC ha ka ISL. U Jeje u la pylliem ïa u Myntri ka Koit ka Khiah jong ka Mizoram.
Ka MNF ka la jop tang 9 Seat, ka BJP 2 Seat bad ka Congress tang 1 Seat ha kane ka elekshon MLA, ha kaba ïa ki vote la ñiew mynta ka sngi, namar ba ka 3 tarik ba la buh da ka ECI kadei ka Sngi U Blei. Ka ECI ka la pynkynriah noh ïa ka tarik ñiew vote da ka jingpyrshah jong ki paidbah ka Mizoram, ka jylla kaba don palat 90 percent ki Khristan.