Wat ñiew beiñ ñiew poh ïa kiba duna dkhotmet, ong u Acting Chief Justice ka High Court

Nongstoiñ, Nohprah, 03: Ha ka sngi saitjaiñ 2 tarik Nohprah 2023, ka Meghalaya State Legal Services Authority, ha ryngkat ka jingïatreilang bad ka District Legal Service Authority West Khasi Hills, ki tnad sorkar kiba pher bapher bad kiba ju ïadon bynta lang, ka la pynlong ïa ka Mega Camp cum Awareness Programme kaba ïadei bad ka NALSA Skhim bad kiwei pat ki Skhim Sorkar halor ka phang ‘Bridging the Gap’ lane ‘Ban Pyndap Ïa Ki Bynta Kiba Thylli’.
Ïa kane ka prokram la pynlong ha St Xavier Secondary School Nongkhlaw, Eastern West Khasi Hills District. Ka jingthmu jong kane ka prokram ka long ban pynjan ïa ka jingïadei jong ki paidbah bad ka sorkar lyngba ki jingtip bad ki jingshakri ïa ki skhim sorkar kiba pher bapher kiba ka sorkar ka leh na ka bynta ka jingmyntoi ki paidbah.
U Nongbishar Donburom u Justice H.S. Thangkhiew u ba dei Nongbishar (Acting) High Court jong ka Meghalaya bad Executive Chairman, Meghalaya State Legal Services Authority, u la long u Kongsan ha kane ka jingïalang, ha ka jingïadon ryngkat lang jong u Nongbishar don burom u Justice W. Diengdoh, Nongbishar High Court ka Meghalaya bad Chairman jong ka High Court Legal Services Committee kum u Symbud Kongsan.
Kiwei kiwei ki kynthup ïa u District bad Sessions Judge-Cum-Chairman, District Legal Services Authority, West Khasi Hills District, M. Skhemlon, MHJS, u Member Secretary jong ka Meghalaya State Legal Services Authority, Shillong, E. Kharumnuid, MHJS, Bah. G. Kharmawphlang, IAS, Deputy Commissioner Eastern West Khasi Hills, District, Bah. A. Nongbri, MCS, Addl. Deputy Commissioner West Khasi Hills District, Principal jong ka St. Xavier Secondary School Nongkhlaw, ki ophisar sorkar, ki Rangbah Shnong, ki nonghikai, ki khynnah skul bad kiwei kiwei.
U Nongbishar don burom u Justice H.S.Thangkhiew haba kren kum u kongsan ha kane ka jingïalang, u la ong ba ka kamram jong ki Nongbishar ka dei ban bishar bad pyndep ïa ki kamram hapoh Ïingkashari. Hynrei ha kajuh ka por, ka dei ruh ka kamram jong ki Nongsbishar ban peit ïa ka bha ma mïat jong ki paid nongshong shnong bad ka imlang ka sahlang hi baroh kawei, kaba la pynkup bor da ka aiñ na ka bynta ki Nongbishar ban leh kumta.
U Kongsan u la ban jur ïa ka jindonkam ba ki skhim sorkar ki dei beit ban poi sha kiba dei hok ban ïoh. Shuh shuh, u la pynsngewthuh ruh ïa ka jingdonkam jong ki jingshakri kiba ïadei bad ki kam aiñ, khamtam eh ba ki paidbah kin tip khambha shaphang ki skhim kiba don hapoh jong ka NALSA bad ki jingmyntoi kiba ïoh na ka.
U kongsan u la kren ruh halor ka sngi kyrpang jong kiba duna ha ki dkhot met lane ka World Disability Day kaba la rakhe man u snem ha ka 3 tarik u Nohprah ha shi tyllup ka pyrthei bad u la kyntu jur ïa baroh ban ym ñiew poh ne ban beiñ ïa ki briew kiba don jingduna ha ki dkhot met bad ban ym iuh roit ïa ka hok ka jong ki. Hynrei dei ban ïarap na ka bynta jong ki, khnang ba ma ki ruh kin im ïa ka jingim kaba dap da ka jingkmen, namar ka hok jong ki ruh ka dei ka hok longbriew man briew kumba long kiwei pat.
Kiwei pat ki prokram ha kane ka sngi ki kynthup ïa ka jingsam ïa ki tiar jingïarap sha ki briew kiba dun ha ki dkhot met ki ban ïarap na ka bynta ka jingim ka jong ki. La ïoh ruh ban sam ïa ki cheque bad ki work order sha ki nongïoh jingmyntoi lyngba ki skhim sorkar kiba pher.
U Bah G. Kharmawphlang, Deputy Commissioner, Eastern West Khasi Hills, u la ai ka jingkren khublei na ka bynta kane ka prokram, ha kaba u la pynpaw ka jingkhublei sha baroh kiba la wan ban ïa shim bynta ha kane ka jingïalang bad kiba la pynlong ïa kane ka prokram ka jop.
La pynwai ïa kane ka jingïalang da ka jingrwai ïa ka Anthem jong ka Ri India, kaba la ïalam da ka Meghalaya Police Cultural Troupe kaba la ïa shim bynta da bad rwai shitrhem da baroh ki nongwan sha katei ka jingïalang.