Khyrwit Hat-trick ka BJP ha Madhya Pradesh, Rajasthan bad Chhatisgarh, jop ka Congress tang ha Telangana

New Delhi, Nohprah 03 : Ka BJP ka la khur hat-trick da kaba jop haduh lai tylli ki jylla na ki saw tylli ha ka jingpynbna ïaka elekshon MLA ha kane ka sngi U Blei ha Madhya Pradesh, Chattisgarh, Rajasthan bad ha Telangana.
Haba phai shwa sha ka Madhya Pradesh kaba don 230 constituency, ka BJP ka la knieh noh ïa ka bor na ka Congress da kaba jop haduh 163 ngut (ha u 2018 ka ïoh tang 109ngut) katba ka Congress kaba hïar sha ka kyrdan ba ar ka ïoh tang 66 ngut na ki 114ngut ba ka ïoh ha u snem 2018. Katba ïa ka shi seat pat la ïoh da ka Bharat Adivasi Party – BHRTADVSIP.
Ha Rajasthan pat na ki 199 seat, ka BJP ka la ïoh ban knieh noh ïa ka bor na ka Congress da kaba jop haduh 115 ngut na ki 73 ngut kiba jop ha u 2018. Ka Congress pat kaba ïoh haduh 100 ngut ha ka elekshon ba la dep ha u 2018 ka la ïoh mynta sa tang 70 ngut.
Ha kajuh ka por ka BSP kaba jop haduh 6 ngut ha u 2018 mynta ka la jop sa tang 2ngut katba ki kyrtong shimet bad kiwei pat ki party rit ki la ïoh 12 ngut.
Ha Telangana kaba don 119 constituency, ha u snem 2018 dei ka BRS kaba ïalam ïa ka bor hadien ba ka la jop haduh 88 ngut. Hynrei mynta ka kynti pat ka la jop tang 39 ngut hadien ba ka la shah knieh noh ha ka Congress kaba jop haduh 65 ngut lada nujor bad ki 19 ngut ba ka jop ha u 2018.
Ha kane ka jylla pat ka BJP ka la wan haduh kyrdan kaba lai da ki 8 ngut.Tangba lada nujor bad ka elekshon ba la dep, ka BJP ka jop tang iwei. Ha kane ka kynti ba mynta ka AIMIM ruh la ka ïoh lang 7 ngut ki MLA.
Ha Chattisgarh pat kaba don 90 tylli ki constituency ha u 2018 dei ka Congress kaba ïalam ïa ka bor hynrei mynta ka kynti ka la shah knieh noh ha ka BJP kaba la kiew na ki 15 ngut ha u 2018 sha ka 54 ngut mynta u snem. Ka Congress ha kane ka jylla kala ïoh mynta sa tang 35 ngut na ki 68 ngut ba ïoh san snem mynshwa.
Ha kajuh ka por, ka BSP kaba ïoh arngut ha u 2018 ka la ïoh mynta sa tang uwei u MLA na ka party.
Haba kren halor kane ka jingjop, u nongïalam ba rangbah ka BJP ha ka ri ba dei ruh u Myntri Rangbahduh ka Ri, u Narendra Modi ha ka jingkren sha ki nongkyrshan hadien ba la dep ñiew vote u la ong, “La don kiba ong ba kane ka hat-trick kadei ka dak na bynta u snem 2024. Kumta kane ka dak ba ki paidbah ki ai ka kdew ba ki apidbah ki long pyrshah ïa ka kam bamsap bad ka politik na kajuh ka longïing.”
Na ka liang u heh duh ka Congress, u Mallikarjun Kharge u la ong, “Ngi ai ka jingkhublei ïa ki paidbah ka Telangana kiba la ai ka jingjop kaba donburom ïa ka party. Ngi kwah ruh ban ïa khublei ïa baroh kiba la pynjop ïa ka Congress ha Chattisgarh, Madhya Pradesh bad ruh ha Rajasthan.”