539 ngut kiba ioh pang HIV/AIDS ha Ri-Bhoi, ïathuh ki Doctor haka jingrakhe ïaka World AIDS day
Nongpoh, Nohprah 02: Daka jingangnud ban pynphriang ïaka khubor halor ka jingma jong u khñiang jingpang ñiangkulia ne HIV/AIDS bad ban pynshai ruh sha ki paidbah ïaki lad jingïada ïa kane ka jingpang mynta ka sngi ka ophis jong District AIDS Control Officer Ri-Bhoi District ka la rakhe ïaka World AIDS Day bala pynlong ha Auditorium Hall Umsning.
Ha kane ka sngi la wan ban ïadon lang da u Dr. Celestine Lyngdoh MLA ka Umsning kum u kongsan haka jingsakhi lang Dr. E Kalwing District Tuberculosis Officer bad District AIDS Control Officer Ri-Bhoi district, Dr. L Myrthong Deputy Director MACS Shillong, kong G Jyrwa Clinical Service Ophisar, District Integrated Strategy for HIV/AIDS, Rocky Kylla Chairman Umsning Town Dorbar, Rocky Marweiñ Rangbah Shnong Umsning Proper B, ki dkhot jong ka Seng RAWA, ki longkmie longkpa lem bad ki nongtrei naka tnad ka koit ka khiah.
Haba kren ha katei ka sngi ka Dr. E Kalwing kaba dei ka District AIDS Control Officer jong ka Ri-Bhoi ka la ïathuh ba hapoh jong ka jylla Meghalaya ki don haduh 7835 ngut kiba ioh ïa une u khñiang jingpang bad hapoh jong ka Ri-Bhoi District ki don haduh 539 ngut kiba ioh ïa kane ka jingpang bad 332 ngut kiba dang don hapdeng jong ka jing dih dawai.
Shuh shuh ka la ong, ban ïaleh pyrshah ïa une u khñiang jingpang ngi donkam ka jingïatrei lang jong ki nongïalam shnong lem bad ki paidbah nongshong shnong bad ha kane ka jingïaleh pyrshah ïa une u khñiang jingpang ki nongïalam shnong ki don ka bynta kaba khraw ha kaba ki don ïaka bor ban pynsaphriang kloi ïaki khubor sha baroh ki shnong la kadei ha sor ne nongkyndong bad lyngba ka jingïarap jong ki nongïalam shnong ngin lah ban pynsaphriang kloi ïaka khubor shaphang une u khñiang jingpang hakaba ïadei bad ki dak ki shin kiba paw shabar haba don ïa une u khñiang jingpang hapoh ka met jong u ne ka briew bad ruh ban pynpoi sha ki briew ïaka khubor kumno ban ïada na une u khñiang jingpang bad ki lad jingsumar kiba lah ban ioh na ki jaka sumar sorkar.
Shuh shuh ka la ong, ka jingtieng bad ka jinglehraiñ jong ki briew kiba don ïa une u khñiang jingpang kadei kawei ka daw bah kaba pynlong ïaki ba kin nym poi sha ki jaka ai jingsumar bad lyngba ka jingai mynsiem bad pynshlur jong ki nongïalam shnong kin sa long kloi ban wan shakhmat ban leit phah sumar ïalade bad ban dih dawai tista.
U Dr. Celestine Lyngdoh kum u kongsan jong katei ka program u la ong ba lada kine ki 539 ngut kiba don ïa une u khñiang jingpang kin ïa kynduh lang hajuh bad kin poi ban ïa kylli ba kumno ki ioh ïa kane ka jingpang, don ki ban ong ba ki ioh ïa une u jingpang dei namar ba ki pyndonkam ïa u drug ha ki por ba mynshwa bad don ruh ki ban ong ki ioh positive namar ba ki im iaka jingim kaba lyngkar bad don ruh ki ban ong ba ki ioh ïa kane ka jingpang namar ba ki shim snam bad kin bun kiwei kiwei pat ki daw ki ban ïathuh bad dei halor kine ki daw ngi dei ban long kiba addkar haka jingim jong ngi khnang ba ngin lait na kane ka jingpang.
Shuh shuh u Dr. Celestine u la ai mynsiem ïa baroh ki nongïalam shnong ba ki dei ban mih shakhmat ban ïatrei lang bad ka tnad jong ka koit ka khiah ban ïaleh pyrshah khnang ba ngin lah ban rat diengkhong ïa kane ka jingpang. U la ong ruh ba nyngkong eh ngi dei ban pynduh noh ïaka jingibeiñ bad jingñiew beiñ ïa kiba ioh ïa une u khñiang jingpang bad ngim dei ban kiar naki hyrei ngi dei ban ai mynsiem bad pynjan bad ki khnang ba kin nym long marwei haba ki dang don hapdeng ka jingïaleh pyrshah bad une u khñiang jingpang.