Bun ki briew sha ki nongkyndong kim tip ïa ka jingdon ki skhim sorkar bapher bapher

Shillong, Naiwieng 29: Ka District Rural Development Agency (DRDA), ka la pynlong ïa ka prokram kaba ishongkun kum shi bynta ka jingsdang ïa ka Viksit Bharat SankalpYatra ha South West Garo Hills ha MFC, Ampati ha ka sngi Balang.
Lah ban kdew hangne ba ka Viksit Bharat SankalpYatra kadei ka sienjam kaba la sdang ha kylleng ka ri kaba thmu ban ai jingtip bad pynkup bor ïa ki nongshong shnong shaphang ki skhim bad ki prokram ba kongsan jong ka sorkar pdeng.
Ka thong jong ka Yatra ka long ban ai jinghikai bad ïarap ban pynpoi ïa ki jingmyntoi jong ki skhim ba ïadei bad ka bha ka miat. Ka long shi bynta jong ka campaign Hamara SankalpViksit Bharat, kaba phai khmat ban poi sha ki briew kiba shem jingeh, ka jingai jingtip, ka jingïoh jinghikai na ki nongshong shnong bad ka jingkyntiew kyrteng ïa kito kiba dei ban ioh jingmyntoi.
Bun ki skhim jong ka sorkar ki long kiba kongsan ha kane ka sienjam, ba kynthup ïa ka Ayushman Bharat-PMJAY, PM Garib Kalyan Anna Yojana, PM Awas Yoyana, PM Ujjwala Yojana, PM Vishwakarma, PM Kisan Samman Nidhi, Kisan Credit Card, Poshan Abhiyan, Jal Jeevan Mission, SVAMITVA, Jan Dhan Yojana bad kiwei kiwei.
Ha ka jingai jingkren ha ka jingïalang, u Deputy Commissioner jong ka South West Garo Hills, u R.P Marak u la ong ba ka Viksit Bharat SankalpYatra ka dei ka sienjam kaba biang bha namar bun ki briew ha ki jaka nong kyndong kim tip shaphang ki skhim bapher bapher ba ïadei bad ka bha ka miat kaba la mang na ka bynta ka jingmyntoi jong ki.
Haba ai jingtip ba ka Tnat ka Rep ka Riang ka dei ka Nodal department, u la ong ba ka distrik kan buh thong 540 tylli ki shnong hapoh kane ka campaign bad u la pynpaw ïa ka jingpynkhreh kam bad ki kam ban sdang ha ki block bad ki VEC.
U la ban jur ruh ïa ka jingkongsan ban pynïasoh Aadhar jong baroh kiba dei ban ioh jingmyntoi na ka bynta ban ïoh pura ïa ki jingmyntoi jong ki skhim ba ïadei bad ka bha ka miat.
Hashuwa kane, u ADC & PD, DRDA, R.Z.D. Shira, uba long ruh u District Nodal Officer na ka bynta ka Viksit Bharat SankalpYatra, u la kren shaphang ki jingthmu jong ka prokram kumjuh ruh ki kam bad ki prokram ban pynlong ha ki sngi ban wan bad u la kyntu ïa baroh ki tnat ba dei khmih ban ïatreilang bad ki briew ha ka por ba pynlong ïa kine ki prokram. Hadien kane, u la ïalam ruh ïa ka jingbam smai “Hamara Viksit Sankalp Bharat Yatra” ha ka jingïalang.
Ha kane ka prokram, la pynkup burom ïa kiba trei bha hapoh ka NRLM, ki nongtrei Anganwadi hapoh ka ICDS bad kiba ïoh jingmyntoi, katba katto katne kiba ïoh jingmyntoi ki la ïasam ïa la ki jingsngew jong ki shimet haba ki ïoh ïa ki skhim bad ki jingmyntoi ha ka bynta jong ka “Meri Kahaani Meri Zubaani” jong kane ka prokram.
Kum shi bynta jong ka prokram ki tnat bad ki kynhun bapher bapher ki la buh ïa ki stall ha kane ka jaka na ka bynta ban ai ki jingshakri bad ki jingai jingtip na ka bynta kiba ïoh jingmyntoi.