Nongstoiñ, Naiwieng 27: Ha ka sngi saitjaiñ jong ka taïew ba la dep ka 18 tarik Naiwieng, ki ar ngut ki samla Khasi na ka shnong Langpih kiba la tip kyrteng kum u Bijoy Rynñiaw 24 snem bad u Joyningstar Samakha 27 snem ki la shah kem ha ki pulit Assam. Hynrei ha ka 26 tarik Naiwieng kata hadien shibnai thik ba ki la shah set along ha Guwahati ki la ïoh jamin bad ki la wan phai noh sha la shnong.
Kum ban pynkynmaw ba kitei ki ar ngut ki samla ki la shah kem ha ki pulit Assam, katba ki dang wan ïalam ïa ki masi ba ki thied na Hahim na ka bynta ban ri ïa ki ban pynlur lyngkha.
La ong ruh ba ha ka por ba ki pulit Assam ki la kem kitei ki samla, ki la ïathuh ba ki wanrah ïa kitei ki masi na ka bynta ban pynlur lyngkha, hynrei ki pulit Assam ki la kynnoh pat ba ki wanrah ïa kitei ki masi ban shoh doh.
Ka jingmana bad pyrkhing palat jong ki pulit Assam ïa kiba wanrah masi sha Meghalaya ka la sdang naduh ba ka sorkar BJP ka la pyntreikam ïa ka aiñ ban khang noh ïa ka jingot doh ïa ki masi. Nangta ka jingshah kem jong ki Khasi kiba leit thied masi na Assam, ka la jia ruh katto katne bnai mynsuwa ha kaba lai ngut ki Khasi kiba na ki thaiñ Nongtrai sepngi, ki la shah kem najan ka shnong Joypur kaba don hajan Malangkona, katba ki dang wan thied masi na Dhupdhara bad ki la shah set ha along ki pulit Assam palat artaïew.
Ha ki snem ba mynshuwa ka ïew Hahim ka dei ka jaka pdeng ha ka khaïi ka pateng hapdeng ki Khasi bad ki Assamese, kata ki Khasi ki pynpoi ïa ki mar kum u riewhadem, u phan, ka kait, u sying, ki kulai, ki masi khynraw kiba dang ar haduh lai snem ban shalan sha ki Assamese, ba kin pyndonkam kum ki masi lur. Katba ki Assamese pat ki wan pynpoi ïa ki masi lur kiba la tymmen bad ki masi kynthei ha Hahim bad ki nongkhaïi naduh Mawkyrwat ki leit haduh Hahim ban thied na ka bynta ban shoh doh.
