Shillong, Jymmang 14 : U Myntri ka tnad Kamrep ka jylla, Bah Banteidor Lyngdoh u la kular ba un sa shimkhia na ka bynta ban pynïoh biang ïa ka subsidy na ka bynta ka dawai thung jingthung ki nongrep nalor kiwei kiwei ki dawai ha ka jylla.
Ïa kane ka jingkular, u Myntri u la ai ha ka jingkynduh ïa ka kynhun ki nongsynshar shnong hapoh ka jingïalam jong u Egenstar Kurkalang ha ka jingkynduh ïa u hynnin ka sngi.
Katkum ka jingïathuh da utei u rangbah la ong ba u Myntri u la u la pyntip ba ïa katei ka kam ka la don ha ka jingïakren bad ba u la dep ruh ban bthah ïa ki ophisar ba kin pynstet ïa ka kam.
Nalorkata, u ong ruh ba ki nongrep haduh mynta ki dang shaniah tylli beit ha ka urea kum ka dawai kaba kongsan eh na ka bynta ka kam rep kam riang hynrei tang na ka daw ka jingbym patiaw jong ka sorkar barim ki nongrep ki la kynduh bun ki jingeh namar kim ïoh shuh ïa ka dor subsidy kaba la buh ïa ki nongrep ha ka jingeh kaba khraw kaba la ktah ïa ka pla tyngka jong ki nongrep. Katkum ka jingong jong u, ki nongrep mynta ki hap ban thied ïa ka urea ha ka dor kaba 1400 tyngka shi byrni ha ka jaka jong ka 250-280 tyngka shi byrni lada ïaid katkum ka dor subsidy ba la pynmih da ka Chemical and Fertilizer Ministry.
