Shillong, Jymmang 14 : U Myntri ka tnad Social Welfare u ma Kyrmen Shylla ula pynpaw ba un sa pan da ka kaiphod halor ka jingïohi ïa ka video ba shah teh kawei ka longkmie ha u rishot ha ka sngi Iew Musiang ha Iewshyiap namar kane ka video ka la saphriang kylleng halor kane ka jingshah teh kane ka longkmie.
Kat kum ka khubor la ïathuh ba kane ka longkmie ka shah teh tang namar ba ka shah kynnoh ba ka shait ot pla ne kloh pla ha ki sngi Iew Musiang bad la kynnoh ruh ba la don kiba lap ïa ka ha katei ka sngi ïew 10 tarik Jymmang 2022.
Hynrei la ong ba lada ka long kumno kumno ruh kiba lap ïa kane ka jingkynnoh ki dei ban aiti ha ki bor ka aiñ ym ba kin shim ïa ka aiñ ha kti ban teh hakhmat ki paidbah kaba la pynjah burom ïa kane ka longkmie khamtam ba ka video ba la ring ïaka ka saphriang kylleng ki jaka.
Dei halor kane ka nongrim ba u myntri u la pynpaw ba un pan da ka kaiphod ban lap ïa ki jingshisha baroh.
